كلنا بندوّر على شريك حياة مُناسب، ونفسنا ندخل في علاقة تخلينا أحسن، بنحلم نقابل حد نعيش معاه أوقات حلوة ونشاركه تفاصيلنا وحياتنا. لإن في النهاية كلنا بندوّر على السعادة. لكن، مع الأسف أوقات بنقع في علاقات مرهقة، ومضرّة، بتستنزف طاقتنا كلها، وبتخسّرنا نفسنا. البدايات سحرها بيزول، المجهود والمواقف هي اللي بتخلي الحُب يستمر. الاختيار ممكن يكون صعب، ممكن تفتكري إنك هاتقدري تغيريه وتخليه شبهك ومناسب ليكي. ماتعافريش. لو مالاقتيش العلامات اللي موجودة تحت دي، يبقى إنتي بتضيعي وقتِك:
- بتعرفي تعبري عن نفسِك معاه بكل أريحية
بتخافي يحكم عليكي؟ ولا بتعرفي تقولي كل اللي بيجي في بالك من غير ما تفكري؟ ولا في مواضيع مستحيل تتكلمي معاه فيها؟ التواصل شيء مهم جداً، لإنه المفتاح لعلاقة كلها شفافية، واحترام، وصدق.
- النقاش أو الاختلاف
يمكن تبان إنها حاجة سلبية ومرهقة، بس في الحقيقة هي مش كدة. الخلافات علامة واضحة جداً للاهتمام والحُب، لإن لو إنتي او هو مش مهتمين ببعض ماحدش فيكوا هايتعب في إنه يتناقش أو يجادل. وكمان لو مابتختلفوش على حاجة فده معناه إن كل واحد فيكوا بيكتم جواه، وفي النهاية هاينفجر في وش التاني. فكري فيها، إيه أسوأ حاجة ممكن تحصل؟ لو عندِك حق هايتفهم وهايتعلم، ولو إنتي اللي غلطانة، هاتعتذري.
- داري على شمعتك تقيد
كلنا عندنا صحاب، بنحب نحكيلهم ونشاركهم حاجات جوانا. بتتبسطي جداً لما تقعدي معاهم وتشربي كوباية قهوة وتحكيلهم عن آخر خناقة كانت بينِك وبينه، أو هو عامل إزاي في السرير، بيحب إيه ومابيحبش إيه؛ بس هو مش هايبقى مبسوط أو مرتاح خالص لما تحكيلهم كل حاجة عنكوا. هل إنتي فعلاً عايزة تنشري غسيلك كله قدّام جيرانك؟ ويعرف لون وشكل ملابسك الداخلية إيه. أكيد لأ! إحتفظي بخصوصياتك لنفسِك.
- التجاوز
لو اتخانقتوا، واتصالحتوا، انسي اللي حصل وكأنه ماكنش. ماتعقديش في كل مرة تجيبي القديم والجديد، وتفكريه بالخناقة كل شوية. بتتخانقوا على الحاجة لما تكون لسة حاصلة، لكن الموضوع ينتهي ورجعتي تجيب سيرته تاني ده هايخليكي تباني عنيدة وقلبك إسود.
- كوني واقعية
علاقتك بشريكك مش علاقة في فيلم، وإنتي مش نجمة الفيلم. إنتي نجمة أكيد بس مش بالشكل ده. إنتي مش المفروض تبقي ممثلة في العلاقة، وتقولي كل حاجة زي اللي مكتوب في السكريبت، مش لازم كل حاجة تكون مثالية ومظبوطة زي ما الكتاب بيقول. في حاجات لازم تبقة صح، بس ماترهقيش نفسِك، وترهقيه في إنكوا تعيشوا دور مش دوركوا.
- افصلي شوية
أيوة أنا ست متجوزة، وأيوة بزهق من جوزي ساعات، لإني بشر. وهو كمان بيزهق مني. لإني مش نيتفلكس علشان أسليه طول الوقت، وهو كمان مايقدرش يسليني طول الوقت. علشان تتجنبي الوصول لدرجة وحش من الملل، لازم دايماً تفصلوا من بعض شوية. إنتوا الاتنين محتاجين تفهموا وتتفقوا على إن دي حاجة كويسة ومفيدة ليكوا. وإنه مش عيب إن إنتوا تاخدوا بريك. ده مش معناه إنك بتحبيه أقل، أو إنه مابقاش ينبسط معاكي. الفكرة بس إنك محتاجة وقت ليكي لوحدِك، وهو كمان محتاج ده.
- الثقة
أكيد كنتوا مستنيين النقطة دي، وأيوة دي أهم نقطة! لو عنده أكونت على السوشيال ميديا ماتراقبيهوش، لإنه لو مش عايز يبقى معاكي مش هايبقى معاكي! ماحدش أجبره يختارِك. ومانصحكيش إنك تتصلي بيه طول الوقت وتبعتيله كتير، لإنك لو فاضية ومش وراكي حاجة شوفيلك حاجة تعمليها واشغلي نفسِك بحاجة تخليكي مبسوطة ومرتاحة أحسن من إنك تفتشي وراه!
- كوني صاحبته
اللي دايماً بيحلّي الحُب، هو أنكوا ماتبقوش بس حبايب، لكن كمان تبقوا صحاب.
- قرروا سوا
بما إنكوا قررتوا تكون سوا، يبقى في حاجات معينة تعملوها سوا. ومن ضمنها إتخاذ القرارات؛ زي مثلاً إنك تسيبي شغلِك، أو تنقلي من البيت، أو عايزة تحملي، كل دي قرارات لازم تتقرروها سوا.
- بتحسّنوا من حياة بعض
لو بتحبيه، يبقى أكيد هاتكوني عايزة تشوفيه أحسن. ولو هو بيحبك، هايبقى أكيد عايز يشوفك ويخليكي أحسن. شجعوا بعض، الهموا بعض، اسندوا بعض، طلّعي أحسن حاجة فيه، وخليه هو كمان يطلع أحسن ما فيكي.
لإنك شريكة حياته، إنتي معاه، جنبه، في ضهره، بتسنديه لما بيقع، وبتزقيه لقدّام لما يقرروا يقف ويستسلم؛ بتشاركيه وقتك، ومسؤولياتك، وهاتكونوا مع بعض على الحلوة والمرة. علاقتك لازم تخليكي شخص أحسن في كل حاجة في حياتِك، هي دي العلاقة الصحية.
