الشغف قادر يدي معنى و طعم للحياة لأنه ببساطة من غيره مش هيبقى في لازمة لأي حاجة بنعملها. و على قد ما الشغف مهم، فالإجتهاد والمثابرة أهم انهم يخلوا الشخص شجاع و بيحارب انه يوصل لأي حاجة بيتمناها.
و دي رحلة المغنية نسمة هركي اللي بدأت بشغف رحلتها في مجال الغناء من المدرسة. لحد وقت الجامعة لما دخلت كلية فنون جميلة و اشتركت في مسرح الجامعة وفرقة أتيليه المسرح. في وقت الجامعة عملت مسرحيتين واحدة فيهم كانت عرض غنائي عن أغاني تراثية زي أغاني الشيخ إمام وأحمد فؤاد نجم وفؤاد حجاج.قررت بعدها انها عايزة تركز اكتر في الغناء كمهنة فأخدت كذا ورشة عمل مع د/ فتحي سلامة و د/ نيفين علوبة، في الوقت ده كانت جزء من الفرقة الموسيقية بتاعتها (فابريكا). اخر حاجة هي بتعملها دلوقتي هي ورشة مع رامي عطالله.
ليكي أصول نوبية و سودانية، ده أثّر ازاي على طبيعة الموسيقى اللي بتقدميها؟
بابا ليه أصول سودانية و جزء كبير من عيلتنا موجود في السودان، و كمان ماما ليها اصول نوبية.
اختياراتي لطابع الموسيقى النوبية و السودانية في الأغاني بتاعتي كان صدفة بحتة، من صغري كنت أكتر اغاني بميل ليها هي الأغاني الانجليزي و الفرنساوي، بعد كده قررت اني بميل أكتر للأغاني التراثية. بعد كده لما بدأت أعمل الأغاني بتاعتي لاقيتها بالصدفة بتطلع فيها نكهة نوبية. و لما اتكلمت أكتر مع المنتجين و الموزعين عرفت منهم أن الأغاني بالصدفة بتطلع على السلم الخماسي و هو نفس نوع السلم الموسيقي بتاع الموسيقى السودانية والنوبية.
احكيلنا عن التجربة بتاعتك مع كايروكي و هشام خرما.
بحب كايروكي جدًا علي المستوى الفني والشخصي و بحسهم كلهم شبه بعض في الشخصية و طبيعة المزيكا. أول حاجة عملتها معاهم مكملين في 2013، بعدها غنينا كتير مع بعض على المسرح لما اتعمل كأس العالم في مصر، و في كايرو فيستيفال سيتي، و عملنا مع بعض حفلة أو اتنين كمان.
هشام خرما من أكتر الناس المحترمين و المحترفين في مجال المزيكا و اللي فعلًا عنده إيمان و شغف بكل تفصيلة بيعملها. اشتغلت معاه سنتين حفلات لايف و تعتبر من الحاجات اللي أثرت كتير بشكل إيجابي على مشواري لحد ما قررت اني اشتغل سولو لكن لحد دلوقتي ليه كل الإحترام و التقدير.
ايه السر وراء المشاعر الجميلة و البسيطة في أغنية “قمري” آخر اغانيكي؟
كنت كاتبه الأغنية من 2014 و جاتلي بلحنها كنت وقتها في العربية مع جوزي و حسيت اني جالي كلمات عايزة اكتبها طلعت في ساعتها كتبتها بس منزلتش إلا السنة دي كأول اغنية في الالبوم الجديد.
شايفه ايه نوع الموسيقى اللي احنا بقينا محتاجينها في مصر؟
اعتقد الشرقي الأصلي، الموسيقى اللي ليها علاقة بالجذور العربية و المصرية الاصيلة خصوصًا في الفترة دي في موسيقى كتير التوزيع بتاعها شبه بعض. احنا محتاجين اننا نرجع تاني الاغاني بالتوزيع و المقامات الشرقية.
لو نسمة هركي هتبدأ مشروع الموسيقى الشرقي هتبدأ منين؟
حاليًا فعلًا شغاله على مشروع زي ده مع موزع الموسيقى مهاب سامي بس المشروع أخد وقت بسبب ظروف رمضان و الكورونا.
لو ممكن توصفي كل نوع من أنواع الأغاني المهرجانات، البوب، الروك، الموسيقى الشرقية ، الهاوس هتوصفيها بإيه؟
المهرجانات: بحاول أحبه
البوب: ال Spot Light
الروك: The Core
الموسيقى الشرقية: النبض والإحساس
الهاوس: مش بحسه
