ناهد السباعى: ’’متعمليش حاجة لمجرد إنها اتفرضت عليكي وإنت مش مستعدة ليها‘‘

حوار : ريم جميل

ناهد السباعي لازم تبقي علامة من علامات السينما في اختيار الأدوار اللي بتناقش قضايا الستات المصريات. مش هننسي دورها في فيلم ٦٧٨ لما كانت بتناضل ضد التحرش ولا دورها اللي اطلق نجومياتها في إحكي يا شهرزاد. ناس كتير ممكن نشوف ان الممثلة اللي مولودة في اسرة فنية دى متسهل لها كل حاجه بس ساعات بيكون الموضوع أصعب بكتير. أكيد لوجدتك هدى سلطان وجدك فريد شوقى هتفكر مليون مره قبل ماتعمل دور وتسأل نفسك نفس السوأل، هل الفيلم ده ينفع يتحط في مكتبة العيلة؟ القرار دايما مرعب…

ليه بيقولوا ممثلة “جريئة” ؟

فى ناس بتحسبها علشان فى “يوم للستات” كنت لابسه مايوه وفى حمام سباحة مع إنه مكنش دور إغراء، وفى ناس تانية بتحسب إنى جريئة علشان اختيارى ل”هبة رجل الغراب” كان اختيار جرىء جدا، بس أنا عموما لما حد بيقولى إنى ممثله جريئة بتبسط مش بزعل.

فى ناس متخيلة إن كونك من أسرة فنية دى حاجة سهلة، إيه مدى صعوبة ده بالنسبالك؟

فى الأول كنت حابه ابقى على تراك الأفلام المهمة الكبيرة اللى بحُكم صناعها مش هينتسبلى انى بظهر فيها علشان خاطر أهلى، وفى الآخر هيه حاجة حلوه أوى وفى نفس الوقت كمان حاجه تخض، وبحس إنى شايلة حمل، يمكن مش هابقى على نفس المستوى بس على الأقل بحاول ابقى على نفس التراك فى اختياراتى.

إيه الأساس اللى بتختارى عليه أدوارك ؟

أنا بحاول دايماً افضل على نفس التراك، زى ما عملت فى فيلم ” 678 ” و”إحكى يا شهر زاد” و”بعد الموقعة”، يمكن ساعات بحب أعمل حاجات مش شبهى عشان أغير من نفسى شويه، علشان كده بحاول أفضل ما بين أفلام جد وكبيرة، وحاجة تانية زى “اللعبة الأمريكانى” او “هبة رجل الغراب”.

فى فيلم ليكى بتشوفيه بتقولى أنا عملت الدور ده إزاى ؟

بصراحة أنا مش ببقى متأكده قوى لما بشوف نفسى، بس مامتى والناس القريبين منى ببقى مرتاحة لما بيقولولى رأيهم.

فى شخصية تاريخية نفسك تمثليها ؟

لما يبقى فى شخصية الناس حباها بشكل معين بتبقى حاجه صعبة أوى مهما كنتى قريبه منها فى الشكل ، لأن ممكن ادائك ميوصلش للناس لإنهم حبوا الشخصية التاريخية دى بشكل معين.

تفتكرى شكل الفنانة مهم بنسبة قد إيه دلوقتى مقارنة بزمان ؟

المعايير فى كل حاجه بتختلف، فمقدرش اقارن ده بده .

احكيلنا عن هوايه الPole Dancing؟

أنا بحبه جدا وإنك تلاقى حاجة بتحبى تعمليها وبتفيدك وتغيرلك مودك وتغيرلك اسلوب حياتك فى الأكل أو لعب الرياضة، ده حاجه حلوة جدا.

إيه الخطوط الحمرا اللى فى حياتك ؟

عمرى ما حسبتها كده، كل بنى آدم عنده حدود، بس عموما أنا مبحبش أحط خطوط امشى عليها.

انتى عملتى افلام عن المرأة كتير، دى كانت صدفة ولا مقصودة ؟

الموضوع حصل بالصدفة بس أنا حبيتها جدا، والتبعيات اللى بعد الفيلم زى الندوات اللى بتناقش ده أو تأثير الدور نفسه، بتبقى حلوة وبتحسسنى إنى أثرت فى المجتمع بشكل مختلف.

إيه سبب أنك runaway bride ؟

أنا مبسمعش حاجات كتير من اللى الناس حطيتها فى دماغنا أو إتولدنا ولقيناهها. متعمليش حاجة لمجرد إنها اتفرضت عليكي وانت مش مستعدة ليها. المهم انها محققه نفسها بشكل معين، ولو الحاجة دى مبتكلمش الصورة اللى هى رسماها لحياتك متعملهاش، وده اللى المفروض تعمله أى بنت .

بتحضرى لإيه خلال الفترة اللى جايه ؟

“جريمة الإيموبيليا” وهو فيلم سيكو دراما ،هيتم طرحه خلال الفترة اللى جاية.

قرار الإنسحاب من أدوار معينة فى شغلك حاجة صعبة ؟

من الأول إنتى بتختارى شكل الأدوار اللى بتحبى تعمليها، وممكن الممثل أو الممثلة بعد كده يحب يغير شكل الأدوار اللى بيعملها، لكن فى الآخر طالما اختارتى الطريق ده فى حاجات بتتبنى عليه، والتغيير حلو بس لازم تبقى عارفه إيه اللى مع وضد الإختيار ده.

تفتكرى الستات عايزين إيه ؟

(ضحك كتير) بتهيألى محدش عارف الستات عايزين إيه.

No Comments Yet

Leave a Reply

Your email address will not be published.