الحرية مش معناها إن مايكونش عندك إلتزامات، الحرية هي إنك إنت اللي تحدد إلتزاماتك بنفسك.
الحقيقة أنا مش عارفة أفهم ليه في ناس بتعتبر إن إنجاب الأطفال حاجة مميزة جداً وصح ولازم تحصل! أنا بيبقى نفسي أكون لطيفة، ونفسي أبقى من البنات اللي لما يشوفوا طفل في السوبر ماركت عينيهم تطلع قلوب ويقعدوا يلاعبوه، وجسمهم يقشعر لو الطفل ده ابتسملهم! لكن بالنسبالي أنا: مابيفرقش معايا! التصرف الأمومي اللا إرادي تجاه أي حاجة صغيرة وكيوت مش حاجة بتجري في دمي! الخلفة قرار شخصي جداً؛ لكن في مجتمعنا ده قرار بتاخديه والعالم كله باصصلك!
إحنا خلقنا جدول زمني لكل شيء! على سبيل المثال، الخطوبة لازم تقريباً تبقى مدتها سنة. الوقت الطبيعي اللي تستني فيه علشان تقرري تخلفي بعد الجواز هو سنة كمان؛ الوقت الطبيعي بين كل مولود والتاني هو سنتين أو ثلاثة. ليه؟ إيه حكايتنا مع عقارب الساعة اللي مابتقفش والضغط المستمر علشان ننفذ كل حاجة في الجدول الزمني بتاع المجتمع؟ ليه لازم أول ما ابنك يبطل يعمل بيبي على كنبتك المفضلة، ويبقى أخيراً بيعرف ياكل كويس وينام في معاد معين، تقرري تخلفي طفل تاني؟ ده كأنك شفتي خمس أفلام ورا بعض ولما خلصتيهم قررتي تشوفي تسع أفلام تانيين على طول. في إيه؟ مفيش راحة خالص؟ أنا لسة عندي خطط لنفسي يا جماعة!
أنا بحترم قرار أي شخص في إنه يخلف أي عدد من الأطفال هو عايزه، أو حتى مايخلفش أطفال خالص. مابحكمش على حد. ولا في إيدي ساعة بيولوجية بفكر فيها. مفيش ضغوط عائلية من نوع “نفسي أشوف أحفادي قبل ما أموت” ولا “خلفي بدري علشان تعرفي تعيشي حياتك بعد كدة!” وغيرها من الأحاديث السخيفة! إحنا ليه مستعجلينن؟ الأطفال بيتجودوا علشان يكونوا مصدر بهجة في البيت، وياخدوا كل الوقت والمجهود اللي هما محتاجينه. إنتي اتجوزتي وإنتي عندك 21 سنة، ولما بقيتي 30 سنة بقى عند 3 عيال – ودي حاجة عظيمة، لكن عمرك فكرتي تعملي حاجة مهمة لنفسك؟
لما بنتي تمّت سنتين، العام بقى يبصلي بإستياء، ويسألوني، مش ناوية تخاوي بنتك بقى؟ عمري ما كان عندي رد على السؤال ده؟ أنا أصلاً ماعرفش أنا هاتغدا إيه النهاردة، وعرفت أقرر بالعافية ألبس إيه وأنا رايحة الشغل النهاردة! حقيقة إني في نص الثلاثينات مالهاش أي تأثير على قدرتي في التخطيط للمستقبل كأني آله عارفة كل حاجة! وفضلت أسأل نفسي، “ليه إتنين؟”
هايحصل إيه يعني لو اختارت إني يبقى عندي طفل واحد أو ثلاثة، ليه واحد قليل أوي وثلاثة كتير؟ لو هما مش بياكلوا أكلك، ولا بيناموا على سريرك، ولا بياخدوا منك فلوس من جيبك ويروحوا بيها المدرسة، يبقى ليه؟ ليه مخططاتي للخلفة مهمة بالنسبالك؟ تعرف إيه عن تجربتي أو وجهة نظري في الحمل والولادة والأمومة علشان تحددلي أخلف كام طفل وإمتى؟
إحنا كأمهات مش لازم نبرر قراراتنا؛ ماتستنيش موافقة المجتمعة. التخطيط الأسري حاجة تخصك إنتي وشريك حياتك. الموضوع متعلق بقدراتك الشخصية والنفسية. واستعداد وسعادة أسرتك؛ تقرري تخلفي واحد أو أكتر أو ماتخلفيش خالص؛ كل دي قرارات ترجعلك. افتكري دايماً إن النضج، الثقة، السعادة هما أساس الجواز الناجح مش الأطفال! الخلفة هي نتاج الجواز الناجح، مش عامل يخليه أنجح!
كتبت: ريجينا عناني
ترجمة: تسنيم عبدالله
