التربية مش حاجة سهلة سواء على الأطفال نفسهم أو على الأهل، خصوصًا لما المشاكل تبدأ تزيد بين الأهل و الطفل في مرحلة ما قبل المراهقة، عشان كده بنقدملك المفتاح السحري اللي هتخلي بيه الفترة دي احسن بكتير و كمان ممتعة.
اقبليهم زى ما هم
لأول مرة تشوفي الجملة هتستغربي، بس أيوه اقبليهم زي ما هم بسعادتهم، بحزنهم، بغلطاتهم، بكل حاجة فيهم، ممكن الجزء ده ما يبقاش حاجة مبرّرة ليكي بس انك تتقبليهم بالكويس و الوحش اللي فيهم جزء مهم جدًا من عملية التربية.
سيبيلهم فرصة يختاروا
المرحلة دي بتبدأ بحاجات بسيطة زي انهم يختاروا الاكل اللى بيحبوه، اللبس اللي عاجبهم، و أهم حاجة عايزين يتحبوا بأنهي طريقة.
قولي لهم على طول انك بتحبيهم
ممكن تقوليلهم انك بتحبيهم مثلًا 10 مرات في اليوم، عشان الطفل اللي حاسس بالحب من عيلته مش هيدور عليه برّا البيت و هو صغير، و ده بينقلنا لفكرة انه أكيد هيتجنب مشاكل كتير في المستقبل ناتجة عن سوء اختيار أو تسرع.
خليهم يواظبوا على رياضة
لاحظي ولادك مهتمين بإيه و بيحبوه، و على الأساس ده خليهم يلعبوا رياضة بتناسب ميولهم دي، ده هيخليهم لما يكبروا يبقوا مشغولين بحاجات مفيدة و يبعدوا عن أي حاجة مضرة، و في نفس الوقت بتحوّلي طاقتهم لحاجة تفيد جسمهم و عقلهم.
اسمعيهم كويس
اديهم فرصة يتكلموا و يعبروا عن كل اللي جواهم ووصلي لهم انك فاهماهم عن طريق انك تستخدمي التواصل البصري، و اتأكدي انك مش هتمشي من قدامهم وهم بيتكلموا غير لما يكون الكلام خلص و انتي فهمتي بالظبط هم عايزين ايه.
في النهاية احنا مش عايزين حاجة غير ان علاقتنا مع أولادنا تبقى كويسة و انهم يقدروا يقولوا كل أسرارهم لينا من غير قلق،
من النهاردة انتي تقدري تعملي كده لانك معاكي المفتاح.
