مسلسل قابيل تجربة مختلفة، وجديدة على الدراما المصرية، خلتنا كلنا قاعدين على أعصابنا ومتشوقين في نفس الوقت نعرف إيه اللي هايحصل؛ وده مش جديد على محمد فراج الممثل اللي دائماً بيبهرنا كل سنة بأداء شخصيات جديدة ومختلفة وصعبة. السنة دي عمل دور الشرير لكن برضه ماعرفناش نبطل نحبه، وننبهر بشطارته. قعدنا مع محمد فراج وسألناه عن قابيل وعن رأيه في الشخصية والعمل والرسالة اللي قابيل بيحاول يوصلها للناس وللستات تحديداً.
- ايه اللي خلاك تقرر تعمل الدور ده؟
أنا كنت على وشك إني ماشتغلش في رمضان السنة دي خالص، كان عندي حالة من الخوف الفني، ماكنتش عايز أعمل دور وخلاص، بحب لما اشتغل اعمل حاجة واسيب بصمة واقدم حاجة مفيدة، وفي نفس الوقت الناس تستمع بيها.
اللي خلاني أحب أعمله هو إن معايا محمد ممدوح وأمينة خليل والمخرج كريم الشناوي وإنتاج MBC فالأسامي شدتني جداً، وأنا كان نفسي اشتغل مع تايسون جداً، احنا صحاب بقالنا 15 سنة واشتغلنا مع بعض في المسرح، لكن عمرنا ما اشتغلنا في تلفزيون وسينما، وكريم الشناوي مخرج شاب ومن جيلي
فلما قعدت معاه وحكالي حدوتة المسلسل اتحمست جداً وشدتني جداً لان الفكرة مشوقة وفيها لعبة صايعة.
- ايه نظرتك لآدم في قابيل وانت بتتفرج دلوقتي؟
حاسس إني مرتاح، مش مبسوط مية في المية منه، بس أنا حاسس إني نضجت فنياً في الاختيار، المميز في قابيل إنه مختلف جداً عن أي دور عملته أو حتى الأعمال الموجودة في السوق دلوقتي. بس ماكنتش خايف خالص وكنت متحمس جداً لإن دور أول مرة أعمله.
- من الحاجات اللي كانت باينة أوي في المسلسل هو العنف الأسري، شايف ليه ده لسة موجودة لحد دلوقتي في مجتمعنا؟
التصرف ده تصرف متخلف جداً، وده مش في مجتمعنا بس هو موجود في العالم كله، بس موجودة في مجتمعنا بنسبة كبيرة، فكرة السادية في التعامل والضرب، وده إن دل على شيء فهو بيدل على التخلف والمرض، لإن دي مش حاجة سوية أبداً في النفس البشرية، وللأسف الشديد في ستات كتير بيعانوا منها وبيسكتوا علشان العيال، أسباب مش منطقية تخليها تبيع عمرها، وده ظلم كبير أوي على الست.
- في مشهد لما طلعت لمراتك بعد ما افتكرتك مت، وبدأتوا تلوموا بعض مين اللي خان الأول، تفتكر ليه الناس بتخون من الأساس؟
النفس البشرية أصلاً مش سوية أوي، يعني لو إنت مش عامل كنترول على نفسك وبتسيب أي حاجة تغرك وتلعب في دماغك هاتعمل بلاوي. الخيانة هي الشرارة اللي ولعت في كل حاجة.
- هل في أي حاجة مشتركة بين شخصية فراج وشخصية آدم؟
لأ مفيش أي حاجة منه شبهي، وماتمناش ده أبداً.
- طاقم العمل كلهم شباب من أول الإخراج للتأليف، تفتكر إزاي ده أثر على المسلسل؟
أفاد المسلسل جداً، روح المسلسل كانت مختلفة جداً، كلنا كنا بنشجع بعض، كريم الشناوي المخرج ومصطفى صقر ومحمد عز وكريم يوسف، وأنا وتايسون وأمينة خليل وبسنت شوقي ونهى نور الدين وروزالين البيه وعلي قاسم كلنا شباب، كلنا جيل واحد، وكلنا متحمسين جداً للتجربة، وكلنا عارفين إننا بنعمل حاجة مختلفة مش موجود زيها دلوقتي، وماتعملش زيها قبل كدة بالتناوال ده.
- إيه الرسالة اللي المسلسل عايز يقدمها من وجهة نظرك؟
في كذا معنى، في اهتمام الأسر ببعضها،وعدم اهتمامهم وتفككهم بيأدي لأيه، دور الصحاب في حياة بعض، يا بيهدوا يا بيبنوا، العلاقات الزوجية، كل علاقة في المسلسل بتقدم رسالة مهمة. لإننا قدرنا نوصل واقع بيحصل كتير جداً،
التفكك الأسري والعلاقات اللي مش سوية بتأدي لكوارث.
حوار: جيداء طه
