الجواز حاجة مقدسة، بتجمع بين إتنين بيشاركوا مشاعرهم وأجمل لحظات حياتهم مع بعض، فاهمين بعض، ومتوافقين، وبيعرفوا يسعدوا بعض، الجواز يُعتبر من أجمل الحاجات اللي ممكن تحصلك في حياتكِ بس لو إختارتي صح، ولازم قبل ما تاخدي خطوة الجواز دي تسألي نفسكِ سؤالين: أنا عايزة أتجوز ليه؟ وليه هاتجوز الشخص ده بالذات؟
دلوقتي مفهوم الجواز بقا مشوّه، لإن الناس بقت تتجوز علشان الأسباب الغلط، وللأسف بيدركوا متأخر أوي إنهم مختاروش صح وبيندموا بعد فوات الأوان، ومن الأسباب الغلط اللي الناس بتتجوز عشانها:
عشان تهربي من تحكُمات أهلكِ وطريقة حياتهم وتبقي حرة وبراحتك
لو فاكرة إنك ممكن تلاقي السعادة والحرية برا بيت أهلك، فكّري تاني لإنك لو ماعرفتيش تحققيها برا بيت أهلك مش هاتعرفي تحققيها برا.
أهلك عايزين يجوزوكي لأول واحد يتقدملك علشان يفرحوا بيكي
في أهل بيبقوا عايزين يجوزوا بناتهم علشان يتطمنوا عليهم ويرتاحوا من همهم، ومش مهم هي هاتبقى مبسوطة في الجوازة دي ولا لأ.
كبرتي في السن ولازم تتجوزي
كل ما هاتكبري شوية بعد ما تتمي العشرين كل ما ضغط أهلك هايبدأ يزيد علشان ماتعنسيش، وهايقنعوكِ تتجوزي أي حد حتى لو مش مناسب المهم إنه يعيشك مرتاحة مادياً.
خايفة القطر يفوتك وتفضلي لوحدك
خايفة الوقت يعدي وتكبري أكتر وإنتي لسة لوحدك، وفرصك في الجواز تقلّ. والخوف يزيد كل ما واحدة من صحابك تتجوز واللي اتجوزوا يخلفوا، وكلهم ينشغلوا وتلاقي نفسك لوحدك.
عايزة واحد معاه فلوس
مش فارق معاكِ تتجوزي حد بتحبيه ولا شخصيته عاملة إزاي، المهم يبقى معاه فلوس ويجيبلك اللي نفسك فيه.
عايزة تخلفي وتبقي أم
عايزة يبقى عندك أطفالك، وتبقي أم، بس ماتنسيش إنك مش هاتبقي أم أطفالك بس هاتبقي زوجة حد، والحد ده هايبقى أب لعيالك.
كل دي حاجات تقدري تقوي عليها وتلاقيلها حلول، لكن لو إتجوزتي الشخص الغلط هاتبقي مجبرة تكملي معاه بقية حياتك أو تطلقي وتمري بتجربة صعبة؛ الجواز خطوة جميلة وممكن تغير حياتك للأحسن بس لو إختارتي صح.
كتابة: د/ محمد وديد
ترجمة: تسنيم عبدالله
