الأكيد هو إنه شيء صعب جداً إنك تفضل تأكل أكل صحي من غير ما تستسلم لمُغريات الأكل اللذيذة التي لا تُقاوم. فرح نوفل قالتلنا أحسن نصيحة ممكن نسمعها الأيام دي عن الأكل الصحي في رمضان وإزاي نفضل نشيطين طول الشهر.
إيه أنسب وقت للتمرين في رمضان؟
أنا بحب أتمرن وأنا صايمة، قبل الفطار بكام ساعة. علشان بتبقى أخف جسدياً وفي نفس الوقت بيبقى عندك فرصة تملأ جسمك وتسترجع طاقتك بعد ما تخلص تمرين!
في ناس مابيبقاش عندها وقت تتمرن، إيه أحسن تمارين تنصحي بيها ممكن تتعمل في البيت؟
أعتقد إن كل واحد عنده تعريف مختلفة لمفهوم الحركة والتمرين اللي بيلائم روتينه وحياته.
عموماً، نصيحتي كمدربة حركة هي المحافظة على روتين منظم، يخليك تقوي جسمك، يحسّن صحة القلب والأوعية الدموية، وأخيراً دائماً تتحرك علشان تحمي نفسك من الإصابات.
إزاي بتحافظي على نظام الأكل الصحي في رمضان، مع كل إغراءات الأكل الموجودة؟
بحاول أكون ذكية في الموضوع ده. الفكرة كلها في توازن الأكل في رمضان. أنا شايفة إنك تسيب نفسك تأكل اللي إنت عايزه مرة في الأسبوع هي الطريقة الأمثل علشان تحافظ على نظام غذائي متوازن. براقب كمية السكر اللي داخلة جسمي وبحاول أملى جسمي بالمياه اللي محتاجها وآكل خضار وفاكهة كتير.
إيه روتينك في الأكل في رمضان؟
بأكل أكل صحي أغلب أيام الشهر، بأكل خضار وسلطة كتير، وبختار الأصناف الغنية بالألياف، بالنسبة للبروتين بختار أنواع خفيفة، وكمان دهون صحية، بحلي بالفاكهة والسكر طبيعي، بشرب كميات كبيرة من المياه، وبحاول أقلل من كميات الصوديم، وأهم حاجة بتجمع مع أهلي وصحابي!
رمضان شهر جميل، بيدينا فرصة ننظف نظامنا كله ونشغل دماغنا من أول وجديد، رمضان بيغيرنا من الجسم للروح! دائماً بشوفها فترة جميلة، دائماً.
