عزيزي المراهق، عزيزتي المراهقة،

عزيزي المراهق عزيزتي المراهقة
لكل اللي في سن المراهقة
أنا عارفة إن الموضوع ملخبط.، عارفة إن أهاليكم في حالة إنكار وماعندهمش فكرة عن واقعكم الصعب، أنا  فاهمة ده، أنا كمان فاهمة إن كتير منكم ليكم نشاط جنسي، بس من غير تعليم أو ثقافة جنسية ومعظم معلوماتكم جاية من المواقع الإباحية أو جوجل، أنا متفهمة صعوبة إنكم توازنوا ما بين تعليمكم وتربيتكم الغربية مع محيطكم المتدين المحافظ، أنا فاهمة إنكم فاكرين إن إحنا مش متفهمين، أنا كمان كنت فاكرة كده لما كنت مكانكم.
.

عزيزي الولد المراهق،

لما تكون في حفلة أو النادي أو المدرسة وتشوف بنت وتلمسها بطريقة غير لائقة ده إسمه تحرش جنسي.
لو البنت دي شاربة كحول أو مش في وعيها وانت لمستها ده إسمه اعتداء جنسي، لو نمت معاها وهي مش في وعيها أو مغمي عليها ده إسمه اغتصاب.
لو ابتزيت بنت بصور (نودز) بعتتها لك دي جريمة، لو ابتزيتها وطلبت خدمات جنسية ده إسمه اعتداء جنسي وبرضه جريمة.
لو بعت لبنت صور أعضائك التناسلية ده إسمه تحرش جنسي.
لو انت في علاقة مع بنت وهي أنهت العلاقة دي وانت هددتها إنك تدمر سمعتها وتقول لكل الناس إنها مش تمام، ده إسمه ابتزاز وتشهير.
لو صورت نفسك فيديو مع بنت من غير علمها وبعت الفيديو لأصحابك ده اسمه &%$!@.
لو بتنمّ على البنات مع أصحابك الولاد وبتقولوا عليهم مش تمام، شمال، شقط، والكلام ده، ده تشهير.

لو شفت أي حاجة من اللي فاتت أو تعرف حد بيعمل كدة أرجوك قول لحد كبير، انت في إيدك إنك تنقذ شخص من الإعتداء بإنك تتكلم. إنك تسكت ده بيخليك شريك في الجريمة.
الموافقة معناها إنك تطلب إذن.
لأ يعني لأ، دايمًا

عزيزتي البنت المراهقة

إنتي كفاية، ماحدش المفروض يعتدي عليكي، إنتي تستحقي الحب والإحترام، ارجوكي حبي نفسك واعرفي إن أهلك بيحبوكي حب غير مشروط.
لو طلب منك صور (نودز) “عشان بيحبك” أرجوكي ماتبعتيهاش، أي حاجة بتبعتيها أو تحطيها على الإنترنت هتروح خصوصيتها وهتستخدم ضدك.
لو بعتي الصور وهو ابتزك بيها، أرجوك ماتديلوش اللي هو عايزه، سكرين شوت زي دي ممكن تسجنه على فكرة، ماتوافقيش إنك تقابليه أو تبعتي له صور تانيه.
أرجوكي قولي كل حاجة لأهلك أو لشخص كبير بتثقي فيه عشان يساعدك، ماتستسلميش للابتزاز.
لو إنتي في عربية مع ولد وكنتي موافقة على إنك تبقي في عربيته وهو ابتدى يلمسك بطريقة إنتي مش عايزاها، قولي لأ واخرجي من الموقف ده، أي حاجة تحصل بعد ما قلتي لأ تعتبر بغير رضاكي وده يخليها اعتداء جنسي.
لو روحتي بيت ولد وحصل تلامس جسدي بالتراضي وبعدين طلبتي إنه يبطّل، أي حاجة بعد كدة تعتبر اعتداء جنسي.
إنتي عندك كل الحق إنك تغيري رأيك في أي وقت، أي حاجة تحصل بعد كده مش غلطتك، دي اعتداء جنسي.
لو “ولد” كبير فوق الـ٢١ سنة لمسك أو حاول يبوسك بالقوة أو أي حاجة زي كده ده اعتداء على طفل وممكن يتسجن عشانه.
لو حصل لك اغتصاب أرجوكي قولي لأهلك، هما مش هيلوموكي، ماتخافيش وقولي لشخص كبير بتثقي فيه، ماتخبيش حاجة زي دي.
انتي عندك حقوق، أرجوكي إتكلمي وحاولي تحكي لحد بتثقي فيه، إنتي مش لازم تكوني لوحدك في حاجة زي دي، لأ يعني لأ.

أعزائي أهالي البنات المراهقات

بعد ما اشتغلت مع كتير من ضحايا الاعتداء أنا ممكن أقول بثقة إن كلهم كان عندهم نفس العامل المشترك: الخوف من الأهل و”الفضيحة”.
البنات كانوا بيفضلوا إنهم يتقبلوا أن يحصل لهم ابتزاز وإنهم يغصبوا على أفعال جنسية على إنهم يعترفوا لأهاليهم ويطلبوا المساعدة.
أرجوكم اتكلموا مع أطفالكم، أرجوكم روحوا لبنتكم وقولوا لها إنكم بتحبوها بالرغم من أي حاجة.
قولوا لها إنها لو فعلًا بعتت صور كده هتكونوا زعلانين بس هتقفوا جنبها، قولوا لها إنها مش ممكن تحت أي ظرف من الظروف يحصل لها ابتزاز مادام انتم بتحبوها وبتدعموها.
قولوا لها إنها جميلة وذكية وتستحق الحب والاحترام والثقة، قولوا لها إنها لازم تحارب وتمشي لما حد يتعدى حدوده، قولو لها إن جسمها ليها لوحدها، وهي الوحيدة اللي ليها حكم عليه، حبوها حب غير مشروط.

أعزائي أهالي الأولاد المراهقين

أرجوكم اقعدوا مع أولادكم وعلموهم عن التراضي، قولوا لابنكم المراهق إنه لو معجب ببنت لازم يحترمها ويطلب الإذن قبل أي حاجة يعملها، قولوا له إن العنف غير مقبول، قولوا له إن لما البنت تقول لا يبقى معناها لا، قولوا له إن مافيش تراضي لو البنت تحت تأثير الكحول لأنها ماتقدرش تدي موافقتها في الحالة دي، فأنت المفروض تحميها، قولوا له يبقى شخص كويس ولطيف، العالم محتاج رجالة كده أكتر.

اسمحوا لأولادكم إنهم يعبروا عن مشاعرهم ويعيطوا ويكونوا حساسين، انقذوهم من مفاهيم الذكورة المغلوطة والسامَّة.
قولوا لأبنكم المراهق هو كمان ليه حدود وإنه مش المفروض حد يلمسه بدون رضاه.
قولوا له إن البورن مش حقيقي وإن الحب حاجة غالية وجميلة لازم نحترمها، قولوا لأبنكم المراهق إن “كلام قعدات الرجالة” عن اللي عملوه مع البنات عشان يثبتوا “ذكورتهم” مش هو المقياس الحقيقي لأنك تكون “راجل” بجد.

كفاية سكوت.

لو إنتي ناجية من اعتداء جنسي ومحتاجة مساعدة ابعتي إيميل لـ abusereliefaide@gmail.com
ملحوظة: الأولاد كمان معرضين للتحرش الجنسي، كل اللي كتبته فوق ينطبق على الجنسين، أرجوكم اطلبوا المساعدة لو أي حاجة من اللي مكتوبة فوق حصلت لكم، إحنا مصدقينكم!

No Comments Yet

Leave a Reply

Your email address will not be published.