ترجمة: نوران العشري
تجارب الحب اللي مابتكملش مش مقتصرة على سن أو جنس معين. كلنا بنجرب الوجع ده في مراحل كتير. لما كنا أطفال وحبينا ناس مكانوش مهتمين، ولما كنا مراهقين وفركشنا لأول مرة ولما كبرنا وعانينا مع تجارب جدية أكتر. اختلافاتنا كبني آدمين تخلينا نقول إن كلنا بنتعافى بطرق مختلفة وكل واحد بياخد وقته.
بعد أي تجربة فاشلة، بنقعد ندور على حاجة تقفل الموضوع برة مننا بس للأسف مش بنوصل للي احنا عايزينه أو فاكرين نفسنا محتاجينه لأن عملية التعافي دي بتحصل من جوانا. نهاية الموضوع ممكن نكتسبها بنفسنا لو عرفنا نوجه نفسنا لإيه ونتعلم إزاي نتعامل مع اندفاع المشاعر اللي بيحصل جوانا.
التقبل
ده الجزء اللي سهل نقوله وصعب نعمله. تقبلوا إن العلاقة خلصت! ساعات بنفضل متعلقين بأمل الرجوع تاني. بنسمح لنفسنا إننا نفكر في السيناريوهات اللي كانت ممكن تحصل. بنفضل متمسكين بافتراضات إن لو حاجات معينة اتغيرت، علاقتنا هتكمل وتبقى أحسن من الأول. الحقيقة، إن الشخص اللي ساب ده ساب لسبب معين. سواء انتوا اللي خدتوا القرار إنكوا تبعدوا أو اتحطيتوا فيه، أول خطة للتقبل هو إنكوا تبقوا عارفين إن شريككوا اللي فات (أو الإكس) هو جزء من حياتكوا اللي فاتت. محتاجين تتعايشوا مع ده وتفكروا في طريقة تخلوا كبرة بتاعكوا أحلى بدل ما نقعد نفكر في امبارح. التقبل بيبعدنا عن الماضي ويقربنا من الحاضر ويساعدنا نرسم صورة أوضح للمستقبل.
اعرفوا الجزء بتاعكوا
بما إنكوا تقبلتوا فكرة إن العلاقة انتهت خلاص، محتاجين ترجعوا تبصوا عليها بوعي. أي تجربة بنمر بيها هي فرصة للنضج. فكروا في دوركوا في الموضوع كله. لازم نبقى فاهمين إن الموضوع عشان يكمل كان محتاج المجهود من طرفين، فماتبقوش قاسين على نفسكوا. خليكوا صادقين. شايفين إنكوا كنتوا مقصرين في إيه؟ استغلوا التجربة دي في إنكوا تعرفوا أكتر عن نفسكوا. اعترافنا لنفسنا إننا كان لينا دور في اللي وصلناله في مهاية العلاقة بيخرجنا من دور الضحية وبيدينا فرصة أكبر للنضج.
سامحوا
بعد ما عرفتوا الجزء بتاعكوا في العلاقة، سامحوا نفسكوا! سامحوا نفسكوا على الغلطات اللي عملتوها. سامحوا الشخص اللي كنتوا مرتبطين بيه وافتكروا إنكوا مابقيتوش نفس الشخص. اعترفوا إنكوا محتاجين تشتغلوا على نفسكوا عشان تبقوا أحسن. تعاطفوا مع الشخص اللي كنتوا عليه. سامحوا نفسكوا وشريككوا القديم وعلى دورهم كمان. التسامح اختيار وطريقة عشان تبقوا أقوى. التسامح بيريحنا من الندم المستمر.
ازعلوا
معنى إنكوا نهيتوا علاقة يبقى إنتوا خسرتوا شريك، ودي حاجة محتاجين نزعل عليها. افتكروا إنه عادي تحسوا باللي انتوا حاسينه. احنا بنعدي بمشاعر كتير واحنا بنتعافى من علاقة ما نجحتش. زعل وغضب وساعات إنكار. ادوا نفسكوا فرصة إنكوا تحسوا باللي انتوا حاسينه. تقبلوا اللي انتوا حاسينه واعرفوا إنها مشاعر مؤقتة. ماحدش بيفضل زعلان طول حياته. الزعل ممكن يبقى مرهق جسديًا كمان. ادوا لنفسكوا مساحة للعياط او النوم لو ده اللي انتوا محتاجينه. عبروا عن زعلكوا وغضبكوا لو ده اللي محتاجينه. انزلوا اجروا أو العبوا بوكسنج. خلي بالكوا بس من إزاي وفين تقدروا تطلعوا الطاقة دي وماتخلوش زعلكوا يطلع على الناس اللي حواليكوا.
خدوا وقتكوا
مش المفروض نستعجل الزعل. مشاعرنا السلبية محتاجة تطلع وتاخد وقت زي ما تاخد. مافيش وقت محدد للزعل ومافيش وقت عشان نكون كويسين فيه. مافيش زرار هيوقف مشاعرنا ويخليها مش موجودة، لو خبيناها هتفضل تطلع بشكل مش سليم في أوقات غلط. خدوها واحدة واحدة. في أيام هتبقى أخف من أيام وفي أيام هتبقى صعبة وكئيبة. خليكوا صبورين مع نفسكوا. صدقوا في عملية النسيان واتأكدوا إن الموضوع بيبقى أسهل مع الوقت.
شوفوا نفسكوا
خلوا وقت لنفسكوا. كلنا محتاجين حد يهتم بينا ومافيش حد ممكن يهتم بينا أحسن مننا. ابدأوا اهتموا بنفسكوا. اعملوا عادات صحية أكتر وابعدوا عن العادات اللي مش محتاجينها. اعملوا الحاجات اللي بتخليكوا حاسين انكوا أحسن. كلوا صحي، اتمرنوا أو ابداوا اهتموا ببشرتكوا.
حددوا أهداف
شجعوا نفسكوا. حددوا أهداف قريبة. بما إننا قررنا نكون طيبين وصابرين مع نفسنا في التعافي والنسيان، لازم نستنى في النضج والتطور. حققوا أهداف يومية وبعدين حولوها لشهرية أو حددوا أهداف جديدة طويلة. كافئوا نفسكوا بإنجازاتكوا. شجعوا نفسكوا. الوقت بينسي بس معرفتنا بنفسنا بتساعدنا نتعلم من الوجع. لو وجهتوا تركيزكم ناحية المستقبل والتغيير الإيجابي، هتبقى دي اول خطوة للتعافي اللي انتوا محتاجينه عشان تكملوا. اعرفوا قوتكوا في التسامح واحتوا ضعفكوا.
