ساره عبد الرحمن ’’أنا كبرت على إنى رقيقة و واجهت إنتقاضات على أى حاجة مخالفة لمفهوم الرقة‘‘

 حوار : ريم جميل

ساره عبد الرحمن من الشخصيات اللي أول مانشوفها يبقى نفسنا تكون صحبتنا علي طول. شخصية ناجحة، لذيذة، موهوبة وكمان ذكية جدا. في ناس فاكرة إن ساره حد اكتشفها كممثله من خلال تواجدها العنيف علي السوشيال ميديا بس الحقيقة إن أول فيلم ساره تظهر فيه كان مع أحمد حلمى ١٠٠٠ مبروك من أكثر من عشر سنين!  ساره مش صدفة خالص، ساره موهبة لازم تبقى موجودة على شاشات التليفزيون والسينما من زمان قوى.

 

بيقولوا الناس اللى بتقص شعرها بتبقى طالعة من مرحلة قديمة داخله على مرحلة جديدة؟

ده فعلا، أنا لما قصيت شعرى كنت حاسه إنى محتاجة تغيير وعايزه ابدأ بدايه جديده .

إزاى عارفة تتماشى مع الوسط الفنى بمظهرك الطبيعى، وخصوصا انه لييه حسابات خاصة ؟

أنا سعيدة إنى جزء من الجيل ده، لإنه لييه طريقة مختلفة، وأعتقد أى مجال بيبقى صعب لو أنت جديد فيه، بس أنا حاسه إن فى مساحة إنى أبقى أنا، وده كده كده صعب جوه أو بره الوسط.

مخوفتيش من ظهورك على السوشيال ميديا بعد أول تجربة تمثيل ليكى ؟

خوفت، بس أنا كنت عايزة أعبر عن نفسى أوى وده كان أكبر من الخوف، بس الخوف طول الوقت موجود، وطبيعى اى حد بيسأل نفسه عن تأثير كل خطوة خصوصا لو خطوة متحسبتش قبل كده.

بتحضرى لإيه خلال الفترة اللى جاية؟

فى فيلم قصير أنا مثلت فيه دخل مهرجان فى فرنسا، وده بيعتبر من أهم مهرجانات الأفلام القصيرة.

إختيار الأدوار بقى اصعب بالنسبالك بعد “سابع جار” ؟

أنا بحاول طول الوقت إنى أختار الحاجات اللى عجبانى شخصيا مش مجرد ظهور وخلاص، وبحاول أكون جزء من حاجات أنا شيفاها بتكسر حواجز معينة.

شايفه قد ايه نسبة البنات اللى بتحاول تكون حد غيرها علشان ترضى حد تانى زى ما شوفنا فى “سابع جار”؟

هبه فى “سابع جار” بالنسبالى كانت أول مره اشوف شخصية مكتوبه بالشكل ده، ودى عبقرية هبه يسرى انها عرفت تعمل شخصية عمرى ما شوفتها فى التليفزيون و السينما، والتغيير اللى حصل فى المسلسل ده حصلى كتير، احنا بنفضل طول الوقت فى حلقة، بنتوه ونرجع، وكنت مبسوطه ان فى حاجه زى دى بتتعمل وأنا اللى بعملها.

إيه الأساس اللى هتختارى عليه أدوارك الفترة اللى جاية؟

أنا بحاول طول الوقت أحارب اى نوع من الحدود فى بالى، أنا عايزة ادى فرصة للحاجات اللى عايزة اكتبها، أنا بطلت أعمل فيديوهات لكن لسه عندى حاجات عايزة اقولها، ده غير انى متحمسه ان يكون فى مشاريع مؤمنة بيها اقدر ابقى جزء منها، لكن أنت كممثل مش بتخلق العمل، العمل هو اللى بييجى ولحد ما ده يحصل عايزة افضل اعبر عن نفسى.

مريتى بمرحلة “انتى بنوته”؟

أنا كبرت على إنى رقيقة ولما بدأت أكبر واجهت انتقاضات على أى حاجة مخالفة لمفهوم الرقه، انا لما قصيت شعرى كنت متقبله ان هيكون شكلى زى الولاد، لكن فى الآخر أنا برضه بنت مش هاعرف اغير ده.

إيه مفهوم الرجولة من وجهة نظرك ؟

أعتقد الراجل هو اللى بيقدر يتصالح مع فكرة انه ممكن يكون ضعيف عادى، وأننا عادى ممكن نضعف، نعيط، ننهار،ودى خطوة كبيرة مش أى حد يقدر يعملها.

إيه الدور اللى شوفتيه ليكى وقولتى عليه إزاى عملت كده ؟

كل حاجة، بيبقى نفسى أمسح كل حاجة عملتها قبل كده، أنا فى حاجات كتير مش راضيه عنها، بس من غير ما نلعن اللى عملناه قبل كده مش هنعمل حاجة مختلفة.

الستات عايزين إيه ؟

الستات عايزين يرتاحوا، إحنا بقى عندنا برامج كتير للستات، وواضح ان هيبقى فى إنتفاضة للستات قريب.

 

 

 

1 Comment
  1. انا بحب شخصيتك … نفسى اكون زيك .. بس مش عارفة ازاى …اتبسط بالخوار اللى قراته ليكى

Leave a Reply

Your email address will not be published.