ذكية وعارفة هي بتعمل إيه كويس في المطبخ، وخصوصاً في رمضان!

أسماء جابر، مدوِنة الأكل المتألقة، والطباخة اللي لا يُعلى على أكلها، حبينا نأخذ منها شوية نصائح علشان نعرف إزاي نكمّل الأيام الباقية من رمضان!

إيه نصيحتك للناس اللي بيطبخوا لنفسهم لأول مرة في رمضان؟

أول حاجة جهزوا أكل يكفيكوا أسابيع وحطوه في الفريزر، علشان ماينتهيش الموضوع بزنقة وفي الآخر تضطروا تطلبوا أكل من برّا. مثلاً (فراخ متتبلة، خضار، حاجات للحشو زي السبانخ والجبنة واللحمة المفرومة علشان الجلاش والسمبوسة.)

ثاني حاجة بلاش المبالغة في الأكل، يعني وجبة الطبق الواحد مع طبق سلطة وهاتبقى أحلى وجبة فطار!

إيه الأماكن اللي بتحبي تتسحري فيها؟

الأماكن والشوارع التراثية القديمة! بحب جداً أتسحر في الحُسين والمناطق المجاورة. هناك هاتقضي وقت جميل جداً، وهتاكل أكل يشبع بجد، وبعده تحبس بكوباية شاي أو قهوة، وتتمشى في الشوارع  القديمة الجميلة.

عندك أكلة معينة بتحبي تاكليها في رمضان بس؟ لو عندك إيه هي؟

شعرية باللحمة واللوز المحمص! بعمل الأكلة دي في رمضان بقالي ثلاث سنين وكل الناس بتحبها جداً! وصفة سهلة وطعمها مختلفة وتوحفة!

إيه أسهل تحلية ممكن تتعمل في رمضان لما يكون مفيش وقت؟

أنا بجيب قطايف، بقليهم، بحط عليهم شربات (بكون مجهزاه وشيلاه في الثلاجة) وبحشيهم بأي حاجة أنا عايزاها! كريمة، نوتيلا، لوتس، مكسرات، أو كله مع بعضه.

إيه مكونات الأكل اللي لازم تبقى موجودة دائماً في الثلاجة خصوصاً في رمضان؟

لبن رايب، زبادي، مشاريب رمضان، علب فول، سلطات جاهزة زي الحمص، وأكيد تمر.

No Comments Yet

Leave a Reply

Your email address will not be published.