حوار : ريم جميل
كتبت : حنان الهمشرى
دُرة كان عندها تحدي كبير أول ما بدأت مشوارها، إنها “حلوة”! أيوه، ساعات الجمال ممكن يكون تحدي ان فنانه تثبت انها عندها أكثر من وش حلو وتقول انها فعلاً بتعرف تمثل، بس دُرة أثبتت ده في أكثر من عمل وأهمهم سجن النسا.
’’حلو ان الممثلة تكون جميلة بشرط إن متكونش دى الميزة الوحيدة، فى مصر شوية مفيش الخيال إننا نستخدم الممثلة كممثلة ونطّلع منها حاجة مختلفة، دايماً الممثلات اللى شكلهم حلو بيواجهوا صعوبات أكتر إنهم يثبتوا إنهم مش بس وش حلو، لازم الممثلة تعمل أدوار ويجيلها أدوار تثبت فيها نفسها وده مش سهل.‘‘ دُرة قالتلنا
السينما المصريه دايما معودانا ان لما يكون في ممثلة اجنبية يبقي أوتوماتيكي كده تعمل دور واحده أجنبيه ’’ده مكنش عائق بالنسبالى، ده غير إنى عمرى ما عملت دور واحدة مش مصرية، وساعات بيتعرض عليا دور واحدة مصرية فى عمل مش مصرى، العالم العربى يعرفنى بالإنتماء لمصر، أنا فى بداياتى عملت أدوار شعبية زى سماح فى ’’العار‘‘ و ونيسة فى ’’الأولة فى الغرام‘‘ و’’الزوجة الرابعة‘‘ ودى أعمال من صميم المجتمع المصرى فالحاجز ده راح تماما.‘‘
الست مش مسموحلها الغلطة اللى مسموحة للراجل مع إنها بتتحمل نفس المسئولية اللى بيتحملها الراجل
ساعات بنحس إن مشاكل السيدات في العالم العربي ممكن تبقي مشتركة بشكل أو بآخر، بس دُره كان ليها رأي تاني ’’فى حاجات مشتركة، بس فى إختلافات بتيجى من القوانين على حسب كل دولة، فى دوّل الحقوق والحريات فيها أكتر أو أقل، وأنا شايفة إن الموضوع مرتبط بالفئة الإجتماعية فى أى مجتمع، بمعنى إن فى ناس محافظة، وفى فئات أكثر تحررا، وعلى حسب المحافظات يعنى الصعيد مثلاً مش زى القاهرة، وعموما إستقلال المرأة مش سهل فى كل الدول، بس كلنا لازم نبقى فخورين بالمرأة العربية وإنجازتها، الست مش مسموحلها الغلطة اللى مسموحة للراجل مع إنها بتتحمل نفس المسئولية اللى بيتحملها الراجل.‘‘
طيب ايه يا تري أهم سيناريو علشان الست تحس إنها عندها سلام داخلى ؟ ’’مفيش سيناريو معين، الست لازم تحاول يكون عندها سلام داخلى ، إحنا مبنختارش السيناريو الأمثل، أنا شايفة ان كل حد لازم يكون عنده سلام داخلى رغم الظروف.‘‘
فيلم “كدبة كل يوم ’’ كان من الذ الأفلام اللي اشتركت فيها دُره، رغم إنه فيلم كوميدي لكن كان بيطرح مشاكل مهمة جدا بيقع فيها المتجوزين عموماً، “الجواز صعب جدا انه ينجح فى الزمن ده، فكرة ان اتنين يكونوا عايشين مع بعض ومحافظين على حبهم بالرغم من إختلافاتهم موضوع مش سهل، وخصوصا إن الحياة اليومية بتوّلد مشاكل كتير، وأنا شايفة إنه المهم يتبنى على حب علشان الحب بيخلى الناس تستحمل بعض، أنا معرفش جواز العقل بيمشوه ازاى ، هو لازم يكون عن مشاعر وعقل وإقتناع وثقة.‘‘
نفسى لو كنت عايشة فى الستينات لما كان فى فن ومكنش فى سوشيال ميديا، السوشيال ميديا ورت وجه قبيح لفئة فى المجتمع جواهم حاجات مش حلوة
السوشيال ميديا للفنان بتبقي سلاح ذو حدين. مش سهل أبداً إنك تسمع طول النهار الناس رأيها إيه مش بس في فنك لكن كمان في لبسك أو حتي أكلك، ’’أهم مميزاتها إنك بتشوفى الناس بتحبك قد ايه، لدرجة انهم بيتحولوا لأهلك وبيكون بينك وبينهم علاقة كل يوم، ده غير الجانب الفنى اللى بتنزَلى فيه حاجة فنية أو حاجات ليها علاقة بشغلك، لكن فى نفس الوقت فى جوانب سلبية وضغط نفسى خلقتة السوشيال ميديا على كل المشاهير، ان كل الناس تبقى متدخلة فى خصوصية كل حد، لدرجة ممكن تدى طاقة سلبية ملهاش لازمة، ممكن حد يبقى قاعد مش تعبان فى حاجة يسمح لنفسه يشتم فى أى حد، وده مش حلو، نفسى لو كنت عايشة فى الستينات لما كان فى فن ومكنش فى سوشيال ميديا، السوشيال ميديا ورت وجه قبيح لفئة فى المجتمع جواهم حاجات مش حلوة.‘‘
الوحيد اللى كنت ببعتله كروت هو أبويا علشان كان بيسافر كتير وإحنا صغيرين، بس مكنتش ببعت لولد
قبل السوشيال ميديا والموبايلات، كانت الناس بتبعت جوابات وجيلنا كان محظوظ انه لحق مرحلة بسيطة من العصر ده ’’جالى جوابات حب، الوحيد اللى كنت ببعتله كروت هو أبويا علشان كان بيسافر كتير وإحنا صغيرين، بس مكنتش ببعت لولد.‘‘
طيب يا تري الستات عايزين ايه؟ ’’الستات عايزين سعادة.‘‘
makeup by : yasmine ebeid
