لاقيتي قبل كده ولادك بيكدبوا عشان يخرجوا من ورطة؟ ندمتي على ردود أفعالك في مواقف معينة مع ولادك؟
بتضربي ولادك؟
لو إجابتك على كل الاسئلة دي أه، يبقى انتي لسة محتارة ازاي تربي ولادك صح.
مين قال دايمًا إن العقاب والضرب هم الحل؟ بالعكس دول مش بيمنعوه عن الحاجة عشان هو فهم انها غلط، لا بيمنعوه عنها عشان بس مايجربش العقاب تاني، و بالعكس كمان ممكن مايمنعهوش خالص انه يكرر نفس الحاجة تاني و كمان بيسيب أثر سلبي على نفسيتهم و ثقتهم في نفسهم و العلاقات حواليهم، التأديب والتربية هي الحل ان طفلك مايكررش نفس الغلط تاني، و ده عن طريق انك تعرّفيه الطريقة الصح اللي هو المفروض يعمل بيها الحاجة و تعرفيه غِلط في ايه عشان مايكررهوش تاني.
كل غلطة هيعملها هيتحمل نتايجها
لازم تربي عند ولادك من و هم صغيرين شعور إحترام و تقدير الذات و انهم مسئولين عن نتايج أي غلطة بيعملوها، و ده هيعودهم انهم يتحكموا كويس في نفسهم و يحسبوا أي خطوة هيعملوها كويس عشان مايتحملوش نتايج مش كويسة، و لو جربتوا معاهم الطريقة دي هتلاقوهم بطلوا يعملوا التصرفات الغلط و يستبدلوها بشكل تلقائي بالتصرفات الصح، خليني أديكي أمثلة أوضح :
- ابنك أو بنتك ضرب/ت حد من اخواته و أنتي عايزه تعرفيه ان دي حاجة غلط، الحل اللي بترجعله الأمهات انها تديه أعمال منزلية كنوع من العقاب، للأسف الحل ده غلط لأن النتيجة انه مش هيبطل يعمل الحاجة اللي عملها و هيكررها تاني عشان متعلمش ازاي يبقي في تواصل بينه وبين الناس حتى لو إخواته، و كمان هيكره أي حاجة فيها مسؤولية أو واجبات.
- العقاب بإنك تحرمي ولادك من المصروف دي حاجة غلط، لإنك برضو ماعلمتيهمش الصح انتي بس هتخليهم يبقوا بخلاء لما يكبروا و يخافوا من أي فرصة ممكن تجيبلهم فلوس أكتر عشان يحافظوا على فلوسهم.
- العقاب دايمًا بيخلي ولادك مش مقدرين قيمة نفسهم و حاسين انك مش بتحبيهم، و ده بيدفعهم أنهم يدخلوا في علاقات غير صحية عشان بس ياخدوا الحب ده، زي أنهم يصاحبوا حد بيقلل منهم أو يكونوا مع شريك بيأذيهم لما يكبروا.
و عشان ماتقعيش في كل الغلطات دي اللي ممكن متعرفيش انها غلط أصلًا، هديكي عشر نصايح عشان تربي ولادك تربية سليمة و فعالة:
- خصصي وقت ليكي أنتي و ولادك يوميًا تقضوه سوا تعملوا أي حاجة بيحبوها، و حسسيهم أد ايه انتى بتحبيهم و متقبلاهم حتى بأخطائهم، بس ده مش معناه انك تحسسيهم انهم مش لازم يصلحوا غلطاتهم.
- بصي للمواقف اللي بيغلطوا فيها بصورة مختلفة، من ناحية أيه اللي محتاجين يتعلموه و يعملوه بشكل أحسن المرة الجايه.
- خليكي القائد بالنسبة لولادك اللي بيديهم التعليمات الصح اللي يمشوا عليها بكل حب.
- أعملي قواعد لكل مشكلة تحصل، و عرفيهم ايه النتايج اللي لازم يتحملوها لو المشكلة دي اتكررت، ده طبعًا بعد ما تكوني عرفتيهم الصح.
- اخلقي لهم بيئة صحية و فيها احترام بينكم، و بيني لهم أد ايه انتى بتحبيهم حتى لو بحضن او بكلمة تشجيع، و اسمعيهم دايمًا باهتمام لما يكونوا متضايقين.
- متشاوريش بس على غلطتهم، وريهم كمان الحاجات الصح اللي عملوها و كافئيهم عليها.
- شجعيهم في كل خطوة بيعملوها عشان يكونوا أحسن و مايغلطوش.
- استخدمي طريقة تربية تساعدهم انهم يقووا مهارات حل المشاكل عندهم.
- علميهم ياخدوا قرارات سليمة ووريهم نتيجة كل قرار.
- اتحكمي في نفسك و عصبيتك عشان يعرفوا هم كمان يتحكموا في نفسهم.
خليكي عارفة ان كل مشكلة أو موقف عانيتي فيه مع اطفالك، هيساعدهم انهم يبقوا أشخاص سوية و مسؤولين لما يكبروا.
د/ منار حسن مدربة الحرية النفسية، خبيرة الأبوة و الامومة. و مؤسسة معسكر مكاني اللي بيساعد على تحسين مهارات تكوين الأصدقاء والعلاقات الاجتماعية للأطفال.
