ترجمة: نوران العشري
البيت ابتدى يفضى عليكي. المسئوليات بقت أقل. كل حد من الولاد بدأ ينشغل بحياته الخاصة. دي حاجة كويسة المفروض، انتي بقالك سنين بتجهزيهم للحظة دي عشان يعتمدوا على نفسهم ويقدروا يواجهوا الحياة لوحدهم. بس بتنسي تفكري انتي بقى هتعملي ايه لما هم يبقوا في المرحلة دي.
ده حال ستات بيوت كتير بيحطوا بيتهم وأسرتهم أولوية ويأجلوا دخولهم لسوق العمل، ولما يفضوا ويحبوا يبدأوا شغل بيبقى الموضوع صعب إنهم يبدأوا في السن ده. نفس الحالة دي مرت بيها عبير الضيف، أم لاتنين، وده اللي شجعها إنها تأسس مبادرة حواء بعد الأربعين عشان تسهل الطريق على الستات الأكبر من أربعين سنة في بداية عملهم.
“أنا اتخرجت في 1990 وبدأت أدور على شغل في 2004. اشتغلت على نفسي، خدت كورسات واتنقلت من شركة للتانية وفي 2012 لقيت شركات بترفضني بس عشان سني، اتصدمت!” قالت عبير. رغم ان عندها خبرة 8 سنين ما بين شغل كامل أو نص دوام، كانت بتتفاجئ بالشركات لما يرفضوها ويقولوا إنهم لقوا حد أصغر.
قالت عبير، “كنت دايمًا بسألهم عن السبب بعد المقابلة وفي شركة كان كلها شباب قالولي احنا مش هنعرف نتعامل معاكي ازاي في مكان العمل بسبب فرق السن،” لكن عبير سمعت بعد كدة إن سبب الرفض ممكن يكون عشان السن الكبير معناه مرتب أعلى.
عشان كدة، مبادرة حواء بعد الأربعين بتشتغل على مساعدة الستات اللي بعدوا عن سوق العمل فترة أو حابين يغيروا شغلهم في إنهم يلاقوا الفرص المناسبة عن طريق ورش عمل بيقدموها وتوصيلهم بالشركات المختلفة. ورش العمل بتختلف من حاجات متخصصة تناسب احتياج الفرد في مجال معين زي الأداء الصوتي أو تعليم ميك أب وورش عامة عن مهارات معينة زي تقوية الذاكرة، اتخاذ القرارات بحرص و life coaching.
عبير قسمت الستات اللي عايزة تشتغل لنوعين، نوع عنده احتياج مادي للشغل ونوع عنده احتياج نفسي له. “دورنا اننا نطورها في المجال اللي هي عايزاه، بس هي لازم تبقى حاسة إن ليها أهمية. في ستات بتعاني نفسيًا من قعدة البيت. بيكلمونا يقولولنا احنا عايزين نعمل أي حاجة. عايزين نحس إن في حد محتاجنا،” قالت عبير.
بس اشمعنى سن الأربعين بالذات؟ عبير بتحكي إن السن ده سن صعب في سوق العمل. “لو هي ست هيقولوا مشاكلها الشخصية هتأثر على إنتاجها، نفسيتها هتبقى وحشة، دي دقّة قديمة وحاجات تانية كتير،” شرحت عبير.
عن استبعاد الرجال من المبادرة، عبير قالت إن الرجالة بتلاقي شغل أسهل بكتير لأن كل الناس بتساعدهم، ده الطبيعي، لكنها نادرًأ ما بتلاقي حد بيشجع الستات بنفس الشكل.
حواء ما بعد الأربعين مش بس خلقت جو طيب للستات بينهم وبين بعض، هي كمان ساعدت المؤسِّسة عبير الضيف إنها تكمل مسيرتها. قالت عبير، “حتى لما تعبت وفضلت قاعدة في السرير، كل اللي كنت بفكر فيه هو الرجوع للشغل. بحس إنهم بناتي، حتى لو في منهم أكبر مني، نفسي أشوفهم بينجحوا ويوصلوا أماكن كويسة.”
وصل عدد الأعضاء دلوقتي لأكتر من 400 ولسه في أماكن مفتوحة لأكتر من كدة. تابعوا صفحتهم على فيسبوك وانستجرام، حواء بعد الأربعين، واملوا الاستمارة من خلالهم. هم كمان عندهم سياسة رسوم مجانية لغير القادرين على الدفع.
