حطي كوكونت أويل وحلول سحرية أخرى!

كوكنت أويل

 

“أنا عندى تجاعيد تحت عينى وعايزة بناءا على تجربتكو دكتور كويس فى الفيلرز ومعرفش حد”

-حطي كوكونت أويل يا بنتي!

-لا متعمليش أى حاجة فى عنيكى. عادى جدا إحنا بنكبر فى السن وشكلنا طبيعى يعجز مفيش حاجة أحلى من الجمال الطبيعى.

“أنا عايزة أغير لون شعرى زهقت منه جدا لو تقدروا ترشحولى كوافير”

-لا صبغة إيه؟ لو زهقانة إعملى حاجة تانية أتا صبغت شعرى وندمت جدًا بعدها.

جروبات الفيسبوك 

ده إسمه إيه طيب؟ المشكلة الأولى طبعا إنى بسأل سؤال شخصى فى مكان عام. الإعتقاد إن جروبات الفيسبوك دى مثلا أوضة وصالة وإحنا قاعدين أسرة فى بعضشينا ده إعتقاد ساذج جدًا! هو إيه اللى يمنع إن فى جروب دعم المرأة أو دعم الموضة والجمال يبقى فى ناس أعداء للمرأة وافكارهم مختلفة تماما وأعضاء فى الجروبات دى بس عشان يلاقوا حاجة يحكوها ويضحكوا عليها؟

أنا بدعم قرار أى ست إنها تعمل أى تغيير فى شكلها لو ده هيسعدها.

وبدعم قرار أى ست إنها تسيب جمالها الطبيعى زى ما هو بدون أى تغيير.

وبدعم وجود الكوكونت اويل وزيت الخروع  والكافور!

هو مش الجروب بتاع الستات ده غرضه الدعم ولا إيه طيب؟ هى دخلت تسأل تعمل ولا متعملش؟ السؤال واضح. هى عايزة تعمل حاجة وبتشوف ترشيحات الناس لأحسن مكان تعملها فيه!

“مين دكتور دايت كويس؟”

-إنتى حلوة كدة مش محتاجة تخسى!

“ألاقى فين كوافير بيقص حلو؟”

-شعرك حلو وهو طويل متقوصيهوش!

-حطى كوكونت أويل

المساحة الآمنة

طيب المساحة اللى كلنا كستات شايفين المجتمع مقصر إنه يديهالنا مش من باب أولى نديها لبعض أولا؟

وبرضو بدل ما آخد ترشيح كويس عشان أعمل لنفسى حاجة كنت بتمنى أعملها ينتهى بيا الأمر إنى أخدت جرعة قوية من الطاقة السلبية اللى تحسسنى إنى مليش حق أعمل اللى أنا بقوله ده ومحتاجة إنى أقنع بيه ٣٠ ألف من أعضاء الجروب الشرفاء.

الكلمة اللى أتمنى كل واحدة تعرفها وتفتكرها دايما إنها مش مضطرة تحط نفسها أبدا فى أى سناريو يضطرها إنها تبرر تصرفاتها وإختياراتها لأى شخص. أى موقف من دول بيحسس الست دايما إن السلطة مش فى إيدها، حتى سلطة إختيار اللى هى عايزة تعمله فى نفسها.

فى ستات سعيدة بشكلها زى ما هو وستات حابة إنعا تغّير من شكلها وكل ست فيهم جميلة قبل وبعد وبدون التغيير. وفى ست عايزة تكتفى بإنها تحط كوكونت أويل وبرضو هى حلوة مع جوزالهند الطبيعى.

 

Regina Inani كوكونت أويل
Regina Inani

أنا ريجينا عنانى لايف كوتش وبركز أكتر على مواضيع اللايف ستايل والكاريير. أنا من HR الطيبيين وإشتغلت في شركات مختلفة جوّة وبرة مصر.
عندي إدمان للكتب وشرب القهوة! أنا بحب أقدم محتوى مختلف مبنى على خبرتي.
إيه أكتر حاجة نفسي فيها؟ نفسي أشوف ستات اكتر فى مناصب مؤثرة وعندهم فرص لامتناهية في النمو والنجاح.

No Comments Yet

Leave a Reply

Your email address will not be published.