تصميمات نهاد السويفي: الفاشون مالوش سن

ترجمة: نوران العشري

 

لما كانت بتنزل تشتري هدوم، كانت بتلاقي كل الأزياء الحلوة شبابية واختيارات قليلة ومحدودة جدًا للسن الأكبر. بس هي مستسلمتش لده ولا اتخلت عن حبها وهوسها بالفاشون فقررت نهاد السويفي وهي عندها 49 سنة إنها تبدأ البراند بتاعها لتصميم الأزياء وتبدأ تبيع الحاجات دي أونلاين وللمحلات المختلفة. “كنت عايزة ألبس حاجات تكون شيك وعلى الموضة بس تناسب سني. كنت عايزة الناس اللي في سني يجربوا حاجات جديدة في لبسهم ويفضل شكلهم نفس سنهم،” قالت نهاد. 

 

نهاد في الأساس خريجة كلية هندسة قسم كهرباء ولما بقت أم، سابت الهندسة عشان تتفرغ لتربية ابنها وبنتها بس منسيتش حبها للأزياء. “أنا دايمًا بصمم لبسي بنفسي وكنت دايمًا بعرف في الخياطة. كل ما كنت أحب أعمل طقم جديد، كنت بعمله لنفسي من أوله لآخره،” قالت نهاد. 

 

تعليقات صحابها الإيجابية وتشجيعهم خلاها تبدأ براند لاكسسوارات البيت، Duvattique، وهي عندها 47 سنة، بس بعدها حبت تكمل حلمها في الأزياء وهي عندها 49 سنة (اه…بداية مهنة جديدة وتغيير المهنة في أواخر الأربعينات.) “الموضوع بدأ صدفة لما واحدة أعجبت بتصميم أنا عملته وكنت لابساه وطلبت مني إني أصمملها واحد هي كمان، وبدأت أعمل أكتر من تصميم لحد ما حسيت إنها فكرة كويسة إني أدخل في الصناعة دي،” قالت نهاد. 

 

“الموضوع بدأ صدفة لما واحدة أعجبت بتصميم أنا عملته وكنت لابساه وطلبت مني إني أصمملها واحد هي كمان”

 

قدرت نهاد إنها تخترق المجال الصعب ده ومن أكبر التحديات اللي قابلتها هو إنها تلاقي موظفين يقدروا يفهموا الرؤية بتاعتها. وجودها بشكل أساسي على الإنترنت بيخلي أهم هدف عندها هو إنها تكسب ثقة العملاء وتقدملهم جودة عالية. كمان هي طبقت سياسة للاستبدال والاسترجاع عشان تخلي الناس مرتاحة وضامنة إنهم مش بيخسروا فلوسهم. 

بما إن نهاد ركزت طول حياتها على تصميمات مختلفة ومميزة، الناس في الأول مفهموش التصميمات لأنها كانت مختلفة. شرحت نهاد، “الناس كانت بتقول لي انتي مش معروفة لسه عشان تعملي النوع ده من التصميمات، انتي مش بتكسبي كتير خليكي في الأمان واشتغلي تجاري. خلوني أوقف كذا مرة عشان أعيد النظر في حاجات، بس أنا كنت عنيدة وكنت حابّة تصميماتي. أنا بحب أكون مختلفة وكنت متأكدة إن في ناس زيي.”

 

على قد حبها لتصميم الأزياء بس نهاد مش بتفكر انها تفتح أتيليه أو محل خاص بيها لأنها مش عايزة تضيع وقت في أي حاجة غير تصميم الأزياء. “مش عايزة أخد المشروع على إنه بيزنس بس. عايزة أركز على التصميم عشان يبقى معمول عن حب، لأن ده بيبان. مش عايزة أزحم الدنيا. لو أنا مش حابة الحاجة الأحسن إني معملهاش لأن الناس مش هتحبها،” قالت نهاد. 

 

لما سألناها عن فكرة #مش_عيب_على_سنك، نهاد كان عندها رأيها الخاص. “مفيش حاجة اسمها كدة طول مانتي بتعملي حاجة بتحبيها ومفيدة. اعملي اللي انتي عايزاه والبسي اللي انتي عايزاه، طالما مش بتأذي حد.”

 

عشان تشوفوا تصميمات نهاد المختلفة والمميزة ممكن تتابعوا صفحتها على فيسبوك وانستجرام: Nehadelsewefy_designs

No Comments Yet

Leave a Reply

Your email address will not be published.