تجربتي الحديثة جداً مع الminimalism والcapsule wardrobe.
كان بقالي كام سنة مدمنة shopping وباشتري كتير حاجات بازهق منها على طول، كنت باطلع دايماً اللي مش باستعمله للتبرع كل فترة عشان ما باحبش الحاجة تقعد عندي في الدولاب ما بتتلبسش، وده كان بيساعد شوية في إحساسي بالذنب.
من كام سنة أخدت خطوة ضد الunethical fashion وقاطعت بشكل كبير كل محلات الملابس الكبيرة اللي بتعمل هدوم رخيصة زي Zara و H&M–المحلات دي بتصنع ملابس برخص التراب في مصانع في بلاد مافيهاش رقابة ومفيش حقوق للعمال والمصانع مش متأمنة كويس ضد الحرايق أو ما شابه، العمال بيقبضوا هناك ساعات دولار واحد في الساعة، ده غير إن المصانع دي بتلوث لهم مياه الشرب بالصبغات وبتلوث لهم الهواء.
وفي الآخر احنا اللي بندفع في اللبس ده أكتر بكتير من قيمته الحقيقية وأكتر من مقدرتنا.
– صناعة الملابس تاني أكبر صناعة مسؤولة عن التلوث والاحتباس الحراري في العالم، ومن أكبر الصناعات المسؤولة عن أزمة المياه عشان زراعة القطن بتحتاج مياه كتير جداً. ١٥٪ من القماش بيترمي من غير ما يتصنع بيه حاجة، وحتى لو اتصنع، الشركات دي بترمي أطنان من الملابس الجاهزة اللي ما حدش اشتراها، عشان لو اتبرعوا بيها ثمنها هيرخص. أما اللي بنشتريه، فالإحصائيات بتقول إننا بنلبس ٢٠٪ منه فقط! وبالباقي بنتبرع بيه. أما اللي بنتبرع بيه، حوالي ٩٠٪ منه بيترمي.
– اللبس اللي بيترمي ده بياخد ٢٠٠ سنة عشان يتحلل، وعملية التحليل بتزود مشكلة الاحتباس الحراري.
– حتى الماركات الغالية مش أحسن بل أسوأ بكتير، الجودة بتاعت المنتج ساعات أحسن حاجة بسيطة، أما التصنيع من الناحية الأخلاقية بنفس السوء بالضبط وأسوأ. والماركات دي بترمي أطنان من اللبس كل سنة!
دورت كتير لقيت كمية محلات جديدة بتصنع اللبس بشكل أخلاقي في مصانع معروفة، وفيه منهم بيعمل إعادة تدوير من أقمشة أو بلاستيك، اللبس ممكن يكون أغلى من المحلات اللي زي مانجو وزارا بس أحسن ألف مرة.
بصيت في دولابي لقيت إني بالبس حاجات معينة بشكل مستمر والباقي لأ. وعلى الرغم من كل اللبس اللي باشتريه، دايماً حاسة إن “ما عنديش حاجة ألبسها”، ده مكرمش، ده قصير، ده مش لايق، …
قررت إني هاحول دولابي لcapsule wardrobe وأجرب لمدة سنة أعيش بدولاب مفيهوش أكتر من عدد قطع معين، عادة الإنسان بيحتاج ٣٠+ قطعة لكل موسم (الموضوع ده له طريقة ممكن أبقى أحكي عنها في بوست تاني).
كتبت كل حاجة بالبسها أو محتاجاها في ورقة، طلعت كل حاجة من دولابي، ودخلت تاني بس الحاجات المكتوبة. أي حاجة ناقصاني قررت إني مش هاشتريها إلا من محلات ethical/sustainable. مش باشتري كهواية. مش باشتري عشان فيه خصم. باشتري لو حاجة كاتباها في الورقة وعارفة كويس أنا ليه محتاجاها.
الموضوع بقاله مش أكتر من شهرين وفرق معايا بشكل رهيب لحد دلوقتي: الدولاب على طول رايق، اللبس مش مكربس في بعضه، دايماً عارفة أنا عندي إيه بالضبط، دايماً عندي حاجة ألبسها عشان كل حاجة لايقة على بعضها وما اختارتهاش من فراغ.
ده غير إني وفرت كتير قوي عن التبذير اللي كنت باعمله
كتبت: نوران عزمي
