بيحكيلك مشاكله؟ أهلاً بيكي في الفريندزون!

أي راجل لو بيحكيلك عن مشاكله، مخاوفه من الإرتباط، عقده، أو عن صاحبته القديمة؛ فـ ده مش معناه إنه بيقرب منك بالعكس ده كدة بيبعد عنك وبيحط في الفريندزون.

قبل ما تستغربي وتسألي نفسك إزاي؟ الكلام ده مش بينطبق على جوزك أو خطيبك، لما ترتبطي طبيعي يحكيلك مشاكله في الشغل ومخاوفه ولازم تسمعيه وتحتويه. لكن الكلام هنا عن حد لسة عارفاه بقالك 3 ل 6 شهور، وعلاقتكوا لسة مش واضحة ومش قادرة تحددي إنتوا صحاب ولا أكتر من كدة؟

وفي الحالة دي ماينفعش تبقي “الدكتورة النفسية” بتاعته، ماينفعش يقابلك علشان بس يقعد يحكيلك عن كل اللي مضايقه ويفضفض وتقعدي تحلي معاه مشاكله، ماينفعش تتكلموا في التليفون بالساعتين عمّال يحكي فيهم عن الماضي والعقد اللي عنده بسبب صاحبته القديمة وقد إيه هو محبط؛ والأكيد إنك ماينفعش تبدأي تسأليه وتقوليله “إحكيلي”.

ليه؟

علشان إهتمامه بيكي هايبدأ يقل مع الوقت، مش هايبقى عايز يسمعك قد ما هايبقى عايز يفضفضلك ويحكيلك وخلاص، مش هايبقى مهتم يقرّب منك أكتر من كدة او يخلي العلاقة تاخد شكل تاني؛ وحتى هو مش هايبقى فاهم ليه ولا هايبقى متعمد بس هاتلاقي إن ده بيحصل لا إرادياً مع الوقت.

يوم عن يوم حكاويه هاتزيد ومشاكله هاتزيد، ومع الوقت لما تلاقي إن مفيش تطوّر في العلاقة هاتزهقي ومش هايبقى عندك وقت لكل ده، وهو هاينجذب لواحدة تانية ماعندهاش استعداد تسمع شكاويه وهو على أتم استعداد إنه يسمعها للصبح ويرجع يحكيلك عنها وهاتبقي اتحطيتي في “الفريندزون”.

لو بدأ يحكيلك ويفضفضلك، تعملي إيه؟

بصي الناحية التانية، قوليله هاقوم أدخل حمام، اعملي مكالمة، بصي في موبايلك، العبي في شعرك؛ بينيله بأي طريقة إنك مش مهتمة تسمعي وإن مشاكله مش حاجة مهمة بالنسبالك علشان يتكلم معاكي فيها. ممكن مع الوقت يبدأ ينزعج بس الأكيد إنك هاتلاقي إهتمامه بيزيد وبدأ يحس باهتمام ناحيتك وإنه منجذب جداً ليكي وبيحب يكلمك ومع الوقت العلاقة هاتتطور.

افتكري، إن أي حاجة هاتديلها من انتباهك ووقتك هاتخدي منها كتير، والحل هو إن لما صفة أو كلام مايعجبكيش إعملي إنك مش مهتمة، الطريقة فعّالة جداً في تغيير أي تصرف إنتي مش حباه.

 

ترجمة: تسنيم عبدالله

 

No Comments Yet

Leave a Reply

Your email address will not be published.