” انتى جميلة باختلافِك ” حوار مع إنچى وجدان

من 12 سنة إنجى وجدان كانت البنت الصغيرة اللى طلت علينا لأول مرة في تامر و شوقية، و محدش يقدر ينكر إنها كانت بتخلى لكل حلقة طعم و روح مختلفين بشقاوة و خفة دم هي لوحدها اللى عارفة سرهم .. و بعد كل السنين دى البنت الصغيرة كبرت شوية – سن بس عشان دة مجرد رقم ميعنيش حاجة – لكنها نضجت في التمثيل، الموهبة بقت أكبر و الحلم كمان بقى أكبر.

عن مسلسل طلعت روحى اللى كان أول بطولة مطلقة ليها، و عن الأمومة مع الشغل و الكارير، و ازاى البنت تقدر تحب نفسها و تقبلها، كان لينا حوار مميز جداً معاها هتحكيلنا فيه أكتر عن كل دة.

 

كلمينا أكتر عن دور عليا فى مسلسل طلعت روحى و إزاى اتعرض عليكى؟

عليا من أقرب الشخصيات اللى أنا عملتها لقلبى.. بنت دمها خفيف، كانت حاجة و بقت حاجة تانية ف الشخصية بتاعتها لطيفة جداً و حبيتها. أنا اتفرجت على Drop dead diva زمان و أول ما كلمونى و اتعرض عليا بصراحة مفكرتش و وافقت على طول.

إيه أكتر حاجة حمستك تقدمى شخصية عليا؟

Drop dead diva لما شوفته قبل كدة كان بالنسبالى هي دى بالظبط الرسالة اللى أنا بحاول دايماً أوصلها للناس و أقولها بصوت عالى طول الوقت و أتكلم عنها، فكرة إن الجمال مش هو أبداً جسمنا عامل ازاى أو شكلنا إيه، الجمال الحقيقى هو قلب الشخص دة جواه إيه؟ روحه، طريقة تفكيره.. أي حاجة تانية سهلة و ممكن توصلها بس دول هما الأساس.

فكرة إن الواحدة تحب نفسها و تقبلها زى ما هي.. من بعد ما كانت Model ليها ستايل معين فجأة بقت محامية تخينة، بس من هنا لهنا دة كان صعب بالنسبالها لكنها قبلت نفسها زى ما هى وحبتها و في نفس الوقت خلت كمان الشخصية لبسها حلو و شكلها حلو من كتر ثقتها في نفسها، اللى هو مش معنى إنى تخينة أو وزنى زايد عن الطبيعى إنى أبقى مبهدلة و بلبس واسع و وحش و مش مهتمة بشكلى زى ما كانت فى أول المسلسل، بالعكس لما الشخصية الجديدة دخلت في الشخصية القديمة خلتها تحس إنها تقدر تلبس حلو و شكلها يكون حلو و تحب نفسها و تثق فيها حتى لو هي تخينة، مش دة اللى هيفرق.. ودى أكتر حاجة كنت بحبها في الشخصية.

البنات التخان بيتحصروا فى الكوميدى و دة حلو أكيد لإن عادةً التخان بيكون دمهم أخف بكتير بس دة مش معناه إنهم يفضلوا في الحتة دى أو إنهم مبيعرفوش يمثلوا حاجة تانية

دى تعتبر أول بطولة مطلقة ليكى، بين حماس و خوف.. كنتى حاسة بإيه؟

متحمسة جداً و خايفة جداً.

الشغلانة بتاعتنا صعبة جداً، فكرة إن انتى تبقى تحت الميكروسكوب طول الوقت، ناس كتير مستنيالك غلطة، ناس أكتر مستنياكى تفشلى و تقعى.. و فكرة إنى أفشل دى مكانتش أصلاً اختيار عندى، أنا كنت مقررة إنى هنجح و هعمل كل اللى أقدر أعمله عشان مقعش.

إيه أكتر تحدى قابلك و انتى بتعملى الشخصية دى؟

فكرة إنى بعمل شخصيتين كانت أصعب حاجة بالنسبالى، إنى أبقى بعمل الشخصية القديمة بس مشاهدها كانت قليلة أوى فخلصت، و بقت الشخصية الجديدة بس، و بعد كدة بترجع القديمة تظهرلى تانى فكنت ساعات بعمل مشاهد فيها الشخصيتين واقفين قدام بعض و مطلوب منى أطلع كل واحدة فيهم مختلفة تماماً و بعيدة كل البعد عن التانية.. ف دة كان تحدى كبير بالنسبالى.

عيشى اختلافك و اتبسطى بيه.. مش معنى إن انتى مختلفة يبقى دى حاجة وحشة، بالعكس.. احنا لو كلنا شبه بعض يبقى إيه الفايدة؟

شايفة المخرجين بيحصروا الممثلات أصحاب الوزن الزائد في منطقة معينة بتظلمهم؟ و عملتى إيه عشان تخرجى برا المنطقة دى؟

طبعاً المخرجين بيحصروا أي حد في أى حتة، يعنى مثلاً ممكن تلاقى واحد عمل مرة دور ظابط فخلاص كل ما تشوفيه بعد كدة تلاقيه برضو عامل نفس الدور بشخصية مشابهة للى عمله قبل كدة، ف فيه مخرجين كتير أوى بيستسهلوا لو شافوا حد ناجح في حاجة خلاص بيخلوه يكمل فيها.

البنات التخان بيتحصروا فى الكوميدى و دة حلو أكيد لإن عادةً التخان بيكون دمهم أخف بكتير بس دة مش معناه إنهم يفضلوا في الحتة دى أو إنهم مبيعرفوش يمثلوا حاجة تانية، و خرجت من دة ببساطة إنى كنت بختار بإهتمام جداً، مبوافقش على أى حاجة و مش أى حاجة بتعجبنى.. يعنى عمرى ما عملت دور البنت اللى هتموت و تتجوز و مش عارفة عشان هي تخينة و محدش بيبصلها ، بالعكس أنا في مسلسل تامر و شوقية كان كل حلقة بيجيلى واحد عايز يخطبنى ولا يصاحبنى، ف دايماً بحاول أشتغل على دة و مش معنى إنى تخينة يبقى أنا مقدرش أعمل دة، و لما جالى مسلسل طلعت روحى أنا كنت مبسوطة عشان قدرت أخيراً أمثل كل حاجة مش بس كوميدى كان فيه تراجيدى وعياط و إكتئاب مكنتش محصورة في حتة معينة بس و حسيت وقتها إنى ماشية في الطريق الصح.

التريقة و الايفيهات على التُخان فى الأعمال الفنية خفة دم و تعدى ولا قلة موهبة من الكُتاب فى إضحاك الناس بتخليهم يلجأوا للتكرار و الكليشيهات؟

و لا كدة و لا كدة، أنا شايفة إنها حاجة سخيفة جداً و مبحترمش الفكرة نفسها لكن أكيد بحترم اللى بيعمل دة هو حر، لكنى شيفاها بمنظور تانى وهو إنى لو أنا قدوة لناس كتير ليه أحسسهم إنهم ولا حاجة أو إنى بتريق عليهم ف أدى لناس تانية الحق في إنهم يتريقوا عليهم؟

ليه أطلع عليهم أسماء الناس هتفضل تناديهم بيها طول حياتهم، بالعكس أنا مفروض أعمل رسالة لطيفة للبنات دى إن الحياه حلوة و إن انتى حلوة زى ما انتى، و إنك تقدرى تلبسى و تعملى اللى نفسك فيه، و مش معنى إنك مش رفيعة يبقى إنتى وحشة بس فكرة طول الوقت تريقة على التخان يبقى فين الرسالة في الموضوع؟ عشان كدة مبشوفش الفعل دة لذيذ ولا بيضحك بالعكس.

بتوازنى ازاى بين كونك أم و ممثلة؟ هل الجواز و الأمومة أثروا على كريرك؟

لأ خالص مش حاسة إنهم أثروا على كريرى أبداً، دى حاجة بترجعلك انتى و انتى اللى بتعرفى تظبطيها و إنى أوازن بين دة و بين دة مهياش حاجة سهلة بالمرة، بس لما كنت بصور المسلسل السنة اللى فاتت و كنت بفضل قاعدة فى التصوير من الصبح لبليل، مكنش عندى حل غير إنى أسيب إبنى مع ماما بس جيت بعد كدة حسيت إن لأ أنا كدة مبشوفهوش و محتاجة أشوفه، روحت أجرت بيت كبير و خدت ماما و بابا و فضلنا عايشين كلنا مع بعض طول فترة التصوير، لما بخلص بشوفه بليل، فى يوم أجازتى مبخرجش ولا بشوف حد من صحابى بالعكس بقضى وقت معاه و بحاول على قد ما أقدر أعمل التوازن دة بس هو مش سهل.

تنصحى بإيه البنات اللى المجتمع بيحاول يحطهم فى إطار معين ميخرجوش براه؟

طز في الناس، عيشى حياتك عشان معندناش فرصة غير إننا نعيشها مرة واحدة، ربنا خلقنا كل واحد مختلف بشكل و لون غير التانى.. القصير، الطويل، التخين و الرفيع.. عيشى اختلافك و اتبسطى بيه.. مش معنى إن انتى مختلفة يبقى دى حاجة وحشة، بالعكس.. احنا لو كلنا شبه بعض يبقى إيه الفايدة؟

الحياه أبسط من كدة، عيشيها من غير ما تبصى لحد أو تقارنى نفسك بحد.. انتى جمالك في اختلافك، فكرة إن انتى مختلفة عن كل اللى حواليكى هي نقطة قوتك، هو دة بالظبط اللى بيميزك و اللى انتى محتاجاه.

و مش معنى إن انتى مش Size 0 يبقى انتى وحشة، أو شعرك كيرلى يبقى انتى كدة منكوشة و شكلك مش حلو.. متسمعيش كلام حد، عيشى بالشكل اللى انتى حباه، و اللى يقولك ” أصل بس انتى لو خسيتى هتبقى أحلى” أو ” بس لو شعرك كان مفرود و ناعم أحسن “، قوليله شكراً مطلبتش نصيحتك، أنا كدة مبسوطة بنفسى و عجبانى.

بصى في المراية و خليكى واثقة من نفسك.. حبيها.. هتلاقى كل الناس شايفاكى زى ما انتى عايزاهم يشوفوكى.

أعتقد أكتر حاجة الستات بتبقى عايزاها، انها تتحب زى ما هي.. و تدلع طبعاً !

بتحضرى أى عمل قريب؟

لسة احنا في الصيف ف بيبقى Dead season شوية بس يعنى هيكون فيه حاجة قريب إن شاء الله.

شايفة الستات عايزة إيه؟

اااااااه … *نفس عميق مع ضحك كتير *

انتى تعرفى تجاوبى على السؤال دة؟

دة أصعب سؤال ممكن يتسأل لست أصلاً.

أعتقد إننا بنبقى عايزين نحس إن الناس قبلانا زى ما احنا.. حبانا زى ما احنا، فكرة إن انتى مجنونة عايزة الناس تحبك و انتى مجنونة، هادية عايزة الناس تحبك و انتى هادية.. عايزة تبقى محبوبة زى ما انتى، الناس تبصلك بصة تبقى مبسوطة بيها، بصة مفيهاش عتاب ولا تعليقات سخيفة تضايقك أو ” إيه دة انتى ازاى كدة ! “.

أعتقد دى أكتر حاجة الستات بتبقى عايزاها، انها تتحب زى ما هي.. و تدلع طبعاً !

 

 

 

 

 

 

 

No Comments Yet

Leave a Reply

Your email address will not be published.