البحر من الحاجات اللي كل الناس بتحبها، لكن المحجبات بقالهم كذا سنة مش عارفين يستمتعوا بيه، يا اما عشان مافيش مايوهات شكلها حلو للمحجبات، او عشان النظرة العنصرية اللي بتعاني منها المحجبات لما بييجوا ينزلوا البحر، ريم الشبراوي قررت تغير ده وأسست جلو، ماركة للبوركيني، عشان مشروع التخرج بتاعها، ودلوقتي جلو بتوفر مايوهات للمحجبات واي ستات عايزين مايوه محتشم، بتصميمات جميلة وتشكيلة متنوعة.
ايه الرسالة اللي حابة توصليها بتصميماتك؟
عايزة أمكّن الستات واديهم الثقة في نفسهم وهم على البحر لابسين بوركيني وانشر الوعي ان ممكن يبقى شكلنا حلو وعلى الموضة واحنا لابسين البوركيني.
انتي شايفة ان المحجبات في مصر بيقدروا يلاقوا لبس على الموضة بسهولة؟ خصوصاً لبس السباحة؟
في تجربتي الشخصية انا عانيت كتير عشان الاقي مايوه على الموضة لنفسي، ودايماً كنت بدور على حل، ابتديت بأني افصّل بوركيني لنفسي وعجب ناس كتير اوي وده اداني ثقة زيادة، وقتها قررت اني انشر الاحساس ده لكل الستات اللي عايزين يحسوا بثقة في نفسهم.
تفتكري ليه البوركيني ناس كتير مش بتحبه كدة؟
الموضوع مستفز قوي، في اماكن في الساحل بتمنع الستات اللي لابسة بوركيني من العوم عشان شايفين اننا شكلنا مش حلو ومش على الموضة، هثبت لهم انهم غلط في يوم من الايام.
لقيتي ان بيع البوركيني اصعب من المايوهات العادية؟
بيع البوركيني اصعب من بيع اي نوع هدوم من حيث التسويق والتصنيع والقماش واهم حاجة التصميم، اصعب حاجة هو عمل تصميمات محتشمة بس برضه على الموضة ومش مملة.
هل واجهتي موقف كنتي فيه مش واثقة في نفسك بسبب نوع المايوه اللي كنتي لابساه؟
في اول رحلتي مع الحجاب بس ده ما استمرش، دلوقتي مابيقابلنيش غير عبارات الاعجاب على اني شكلي حلو في البوركيني.
ايه اللي بتحلمي تحققيه في شغلك؟
حلمي اني انشر الرسالة دي على قد ما اقدر هنا في مصر وبرّة كمان، واتمنى ان ماركتي تخلي الستات تبقى واثقة في نفسها وعمرها ما تفكر في قلع الحجاب عشان مش واثقين في نفسهم.
