بعد 5 سنين شغل في بنك، حست إن في حاجة غلط وإن ده مش مكانها فقررت العبقرية، أيتن أمين، إنها تسيب شغلها وتتجه لورش صناعة الأفلام ومن ساعتها وهي بتبهرنا بشغلها. أيتن معروفة بأعمالها زي فيلم فيلا 69، مشاركتها في تحرير 2011: الطيب والشرس والسياسي، والفيلم القصير -راجلها- واللي اتعرض في 10 مهرجانات عالمية. هي كانت كمان من المخرجين التلاتة اللي اشتغلوا على مسلسل سابع جار. فازت بجايزة حورس في مهرجان القاهرة الوطني للسينما المصرية عن فيلمها فيلا 69 وجايزة تانية في مهرجان البندقية السينمائي الدولي عن فيلمها تحرير 2011. احنا اتكلمنا مع المبدعة أيتن أمين عن حبها لصناعة الأفلام، آرائها عن تمثيل الستات في الإعلام وحاجات تانية.
امتى وليه قررتي إنك تغيري شغلك وتروحي لصناعة الأفلام؟
لما سمعت عن ورشة صناعة الأفلام قدمت على طول. عندي شغف للسينما من وأنا صغيرة وكنت بقضي ساعات طويلة قدام التليفزيون وخروجتي المفضلة كانت الفرجة على الأفلام. هناك، لقيت ناس شبهي وقدرت أتواصل معاهم بسهولة، كنت حاسة إني أخيرًا قادرة أتنفس.
إيه رأيك في تمثيل المرأة حاليًا في الأفلام المصرية؟ وإيه رأيك في تمثيل كبر السن للستات؟
أنا مش عاجبني اللي واصلين له، احنا بنرجع بالزمن لورا. في عصر فاتن حمامة وسعاد حسني، كانت الستات هي اللي بتقود الأفلام اللي ليها أعلى إيرادات وكانت الأفلام بتنزل عشان اسمهم. كان ليهم أدوار كبيرة ومهمة مش بس أدوار ثانوية تسند الأبطال. أفلام زي دعاء الكروان، مراتي مدير عام، وخلي بالك من زوزو مش موجودة إلا نادرًا النهاردة. حتى في التمانينات، كانت أفلام محمد خان بتتكلم عن مشاكل الستات اليومية زي فيلم زوجة رجل مهم وأحلام هند وكاميليا. لحسن الحظ، الموضوع أحسن في التليفزيون.
انتي كنتي واحدة من مخرجين سابع جار، مسلسل اتعرف بأنه صور البنت في حالات طبيعية جدًا. تفتكري ليه مهم ان المسلسلات تتبنى نفس الاتجاه؟
أتمنى إني أشوف ده بيحصل أكتر، نفسي الستات يبانوا في صورتهم الطبيعية ويبقى للأفلام والتلفزيون رسايل تمكين أكتر.
في سابع جار، دلال عبد العزيز وشيرين كان شكلهم طبيعي جدًا وكانوا مناسبين جدًا للسن اللي بيمثلوه. رأيك إيه في إن بعض الممثلين بيرفضوا الأدوار اللي تبينهم أكبر من سنهم؟ وتبينهم بسن كبير عمومًا؟
بيتهيألي الموضوع مرتبط بتقبل السن عمومًا. الموضوع مبني على الثقافة السطحية اللي بتربط بين الجمال والسن الصغير. بس الحقيقة هي، الجمال الحقيقي للناس بيظهر في عيوبهم وازاي بيتقبلوها ويتعاملوا معاها. احنا اتعلمنا إننا منقبلش حساسيتنا ونخبي عيوبنا. أنا بحب جدًا عيوب الناس وده اللي بيخلينا نتواصل.
تفتكري الناس في مجال الإعلام محتاجين يعملوا إيه عشان نتخلص من وصمة السن دي؟
نفسي نشوف أكتر ممثلات ومذيعات في شكلهم الطبيعي من غير ما يعملوا عمليات تجميل أو يتخلوا عن حواجبهم ويرسموا تاتو. نفسي الستات في الإعلام يبقى عندهم الثقة اللي تخليهم يظهروا في شكلهم الطبيعي ويبينوا هم مين فعلًا. أنا بحب الستات الفرنسيات، عمرهم ما بيحاولوا يبانوا أصغر هم بس بيحاولوا يتعاملوا على أساس سنهم.
رأيك إيه في فكرة إن الناس في مجال التمثيل محطوطين تحت ضغط الحفاظ على شكلهم 24 ساعة وعمل عمليات تجميل لما يكبروا؟
بكره المبدأ ده! أنا كواحدة من الجمهور معروفة إني ست عندي عيوب، مفيش حاجة اسمها ست مثالية، ولو في هتبقى دي حاجة مزعجة ليا!
