الارتباط بيلعب دور مهم جداً في رحلة اكتشاف الذات من جديد اللي بنعيشها بعد الطلاق. أهميتها بتكمن في إزاي بتحدد الحال اللي إحنا بقينا عليه.
إحنا دائماً بنتطور لنسخ أفضل من نفسنا، وخبراتنا المختلفة هي اللي بتشكل شخصياتنا المتفردة. جزء كبير من الحياة بيتمحور حول العلاقات.
ولإن علاقتنا العاطفية مابتنتهيش بعد الطلاق، كتبنالك قائمة بالحاجات اللي لازم تفتكريها لما تقرري تدخلي عالم الارتباط من جديد.
- خليكي على طبيعتك، من غير أي ضغوطات:
ماتسمحيش لنفسك تحس بضغط. لو حسيتي إنك بدأتي تتصرفي بطريقة مش مريحاكي أو هاتعملي حاجة إنتي مش حباها ماتعمليهاش. إنتي مش مجبرة على أي حاجة تخليكي ترضي احتياجات حد تاني غيرك. اعرفي حدودك وشخصيتك بشروطك إني. اخرجي برا منطقة الأمان بتاعتك باختيارك. لو حسيتي بضغط اسألي نفسك الضغط ده حساه بسبب حد ولا بسبب نفسك؟ خليكي واعية لنفسك وماتضغطيش عليها علشان تتصرف بطريقة مش شبهها علشان تعجب وترضي حد تاني. فدايماً افتكري تبقي صادقة وحقيقية مع نفسك، وتمشي بمادئك وقيمك إنتي، مش حد تاني.
- ماتخديش الأمور بشكل شخصي:
طريقة معاملة الناس ليكي مش انعكاس لشخصيتك، بالعكس ده انعكاس لشخصياتهم. للأسف، في مجتمعنا، الناس عندها تحفظات مع المطلقات، وساعات نظرتهم وأرائهم بتتحكم في طريقة تصرفهم. فماتاخديش الأمور بشكل شخصي. لو حد بيتلاعب بيكي، بيكذب عليكي، بيستغلك، أو بيبصلك نظرة دونية أو سلبية: فغالباً هايبقوا بيتعاملوا كدة برضه مع كل الناس مش معاكي إنتي بالأخص. تصرفات الناس معانا ساعات بتوجعنا؛ بس إحنا لازم دائماً نفتكر إن طريقة تعامل غيرنا معانا مش بتحدد إحنا مين، لكن بتحدد هما مين.
- كوني واعية لمشاكلك:
كلنا بنأخد مشاكلنا معانا وإحنا داخلين أي علاقة لحد ماى نتعافى تماماً منها. علشان كدة خليكي واعية مشاكلك اللي بتاخديها معاكي العلاقة الجديدة ولشريكك الجديد. ركزي مع مخاوفك، مشاعرك السلبية، ثقتك بنفسك أو عدمها. ولاحظي إزاي كل ده بيحرك وبيأثر على تصرفاتك مع شريكك الجديد. ماتسمحيش لتجارب الماضي إنها تأثر على حكمك على الناس: ودائماً افتكري تكوني لطيفة مع غيرك والأهم مع نفسك.
- كوني لطيفة مع نفسك:
ماتلوميش نفسك كتير، لما تلاقيؤ نفسك بتتصرفي عكس شخصيتك. افتكري إنك بتعيدي اكتشاف نفسك؛ بتحاولي تعرفي إنتي مين دلوقتي، وبقيتي عاملة إزاي بعد كل اللي مريتي بيه من تجارب في الماضي أثرت عليكي وغيرت كتير فيكي. وافتكري دائما إنك كل ما كنتي عارفة تسامحي نفسك، كل ما هاتعرفي تسامحي الناس.
- اللي حصل في الماضي بيفضل في الماضي:
إحنا كلنا بنتطور وبنتغير. ماتحكميش على غيرك أو على نفسك بناءً على ماضيكي. فكري دائماً في دلوقتي، في نفسك وفي شريكك النهاردة بقيتوا عاملين إزاي مش كنتوا عاملين إزاي زمان. وافتكري دائماً المضي بيشكل شخصياتنا، لكن مش هو الليبيحكم إحنا مين.
- خلي عقليتك منفتحة أكتر
إنتي بتتغيري لنسخة جديدة من نفسك، فخليكي منفتحة للتعرف على ناس جديدة، وتبدأي مغامرات جديدة. ماتبقيش منغلقة على نوع واحد من الناس اللي إنتي متعودة عليه. إنتي مش نفس الشخص اللي كنتي عليه زمان. وهاتتفاجئي بكم الحاجات اللي ماكنتيش تعرفيها عن نفسك وعن قدراتك. ادخلي مرحلة جديدة، ومختلفة بس ادخليها بحذر، وكوني دائماً منفتحة ومستعدة للي الحياة هاتقدمهولك.
- احنا بنجذب اللي بنحتاجه:
خليكي مؤمنة إن حتى لو الحياة مش دائماً بتديني اللي إحنا عايزينه، فهي دائماً بتدينا اللي إحنا محتاجينه، العالم بيقودنا لرحلة التعافي والتطور اللي إحنا محتاجينها علشان نبقى أجمل وأحسن.
- إنتي المتحكمة في كل شيء.
إحنا دائماً بننسى قد إيه إحنا مسيطرين في مواقف معينة. وفي العلاقات الجديدة ساعات بنسرح، بس ده مش معناه إننا ماعندناش سيطرة ولا تحكم في شكل العلاقة اللي إحنا فيه. كل شخص بنقابله له دور في حياتنا، بس إحنا اللي بنحدد الدور ده مش حد تاني. إنتي المتحكمة في شكل العلاقة، وتقدمها، وتطورها.
- ماتقبليش بأقل من اللي تستحقيه:
إنتي مش مستعجلة، مفيش حد بيجري وراكي، مابقاش عندك الضغوطات من نوع “يا ترى العلاقة دي هاتوصل لإيه” ، فاختاري تكوني مع حد بيضيف لحياتك بشكل إيجابي، حد بترتاحي معاه، بتبقي مبسوطة معاه، حد في نفس مستوى توقعاتك، لإنك مابقتيش مضطرة خلاص تقبلي بأقل من اللي تستحقيه.
- وأخيراً، اتعلمي:
برغم إننا كلنا بنبقى عايزين العلاقة اللي تستمر للأبد، لكن مفيش حاجة بتفضل على حالها، ومفيش علاقة سعيدة للأبدة. اتعلمي دائماً من تجاربك، وفي نهاية كل موقف اسألي نفسك إيه الدرس اللي اتعلمتيه منه، لإن كل الأحداث اللي بتحصلنا في حياتنا بتساعدنا نكبر ونتطور.
