إيفا هابيل، الست ممكن تبقى عمدة

مفهوم العمدة عندنا إنه لازم يكون راجل ضخم وبشنب مبروم وكل الناس بتخاف منه، لكن إيفا هابيل قدرت تكسر القاعدة دي، وكانت أول ست تفوز بمنصب “العمدة” في مصر لقرية إسمها “كمبوها” في الصعيد.

كنتي بتناقشي مع  باباكي فكرة إنك تبقي عمدة لما تكبري؟

لأ، ماتكلمتش معاه في إني اخد المنصب ده خالص، بس أنا كنت دايماً بركز معاه وهو بيشتغل علشان حابة أتعلم منه، علشان كدة بقى عندي خبرة كبيرة منه، وبسببه حسيت إني حابة جداً أكون عمدة.

بعد ما إتخرجتي سافرتي تشتغلي بره، زي أي ولد بيتخرج في التمانينات. فهل بتعتبري إن عيلتك كانت عيلة متحررة مقارنةَ بالعائلات اللي في الصعيد؟

والدي كان راجل استثنائي، عمره ما قالي إلبسي وماتلبسيش، أو إعملي ده وماتعمليش ده. كان دايماً مؤمن إن الستات لازم يتمتعوا بحريتهم ويكون ليهم كيان، ودور في المجتمع.

كان إيه رد فعل الستات في القرية لما بقيتي عمدتهم؟

إتفاجئت بعدد كبير جداً من المشاكل والشكاوي اللي الستات بتعاني منها ماحدش إتكلم فيها قبل كدة. الستات كانوا خايفين يتكلموا في مشاكلهم عن الميراث، أو مشاكل مع أجوازهم وعيالهم؛ علشان كدة قربت منهم وبدأت أحاول ألاقيلهم حلول بأسهل الطرق ومن غير ما أعمل مشاكل على قد ما أقدر.

إيه التغييرات الإيجابية اللي حصلت في قرية “كمبوها” بعد ما بقيتي عمدتها؟

معظم المشاكل الكبيرة اللي كانت بتواجه الستات اتحلت وانتهت بشكل ملحوظ جداً. زي الختان، النهاردة معدل ختان البنات قلّ بنسبة 99%، ودي نتيجة هايلة. حققنا ده عن طريق زيادة وعي الأهل بخطورة الختان وعملنا ندوات مع خبراء علشان نفَهِّم ونعرف الناس أضرار الختان الجسيمة وأثرها المُدمرعلى البنات.

مشكلة تانية من المشاكل الكبيرة اللي كانت بتواجهنا كانت مشكلة الجهل، قدرنا نغيّر ده، دلوقتي الأهالي بقوا مُدركين أهمية التعليم لبناتهم في المدارس و الجامعات.

إيه المواقف اللي بتكون فيها العمدة الست أحسن من العمدة الراجل؟

أنا دايماً كان عندي قناعة إن الستات بتشتغل بضمير أكتر من الرجالة بالذات في الشغل اللي الرجالة محتكرينه. الستات مابتستعملش العنف زي الرجالة ودايماً بيميلوا إنهم يلاقوا حلول سلمية لأي عائق أو مشكلة تواجههم من غير ما المشكلة تكبر.

إنتي لسة ماتجوزتيش لحد دلوقتي، هل صعب نلاقي راجل عظيم مع ست ناجحة؟ 

أنا كنت عايزة أبدأ كاريري وأكون ناجحة  فيه وأسافر ألِف العالم، وأشوف ناس وثقافات مختلفة وبعد كدة أبقى أدوّر على الحُب. من وجهة نظري التوافق حاجة مهمة جداً، الراجل الوسيم اللي شكله حلو مابيشدنيش خالص، اللي بيشدني هو التوافق؛ وأنا  ماحستش بتوافق بيني وبين حد قبل كدة.

كـ عمدة، إزاي بتديري الشارع؟

في أي مكان في الدنيا، أسهل طريقة عشان تحكمي بيها الناس بعدل وتخلي المكان اللي عايشين فيه مكان آمن وراقي هي القانون وتطبيق العقوبات.

 

ترجمة: تسنيم عبد الله

No Comments Yet

Leave a Reply

Your email address will not be published.