قد ايه الفترة دي متعبة في اي علاقة! زي ما إسثر بيرل قالت “لما التلاتة تهدد الاتنين”.
مش هيفرق بقى اذا كان البيه الصغير وصل بعد تسع شهور من الجواز او بعد ست سنين، حياتكم هتتقلب وتتغير، بشكل ايجابي او سلبي، لمجرد ان سلامة وبقاء الطفل ده بيعتمد عليكي، بتلاقي اولوياتك بتتغير ومابقتش ليكي او لجوزك او الشغل او البيت او حياتك الاجتماعية، تاني حاجة هتلاحظيها هي انك فقدتي ارق جزء في علاقتك مع جوزك: الرومانسية.
بس الكويس انك فقدتيها بس ماخسرتيهاش للأبد، انتم بس محتاجين تلاقوها.
أهم حاجة قبل ماتبتدي تدوري عليها، انك تتقبلي المرحلة دي في حياتك لحد ما طفلك يبدأ يستقل شوية، لو حاولتي انك تلاقيها بدري هتفشلي، الكائن الصغير ده قوته كبيرة، ماتتهاونيش بيها، تقدري انك تبقي مدركة الوضع بس ماتتوتريش بسببه.
تاني حاجة انك تدوري على الرومانسية في الحاجات الصغيرة الجديدة، اول ابتسامة لطفلك، اول خطوة، اول كلمة ممكن تعمل رومانسية كبيرة مابينك وبين شريكك، لما بتتعلموا تشوفوا الطفل ده كنتيجة لرعايتكم المشتركة ليه.
تالت حاجة هي انك تدربي طفلك على انه يحترم “وقت ماما وبابا”، ده بيتضمن انك تنيميه في اوضة لوحده، او انكوا تاخدوا كام ساعة تتعشوا فيها سوا مع بعض في حتة او تروحوا سينما او السوبرماركت او حتى تتفرجوا على التليفزيون في البيت، الخطوة دي أساسية في انكوا تستعيدوا الرومانسية في علاقتكم.
رابعاً لما طفلك يكبر ماتتكسفيش من انك تبيني حبك لجوزك بأنكم تحضنوا بعض كتير قدام الأطفال، ده صحي ليهم عشان بيخلق بيئة مليانة حب، وبيأثر على برمجتهم العاطفية، ودي حاجة مهمة جداً لسلامتهم وكمان بينشط الرومانسية في جوازكم.
خامس حاجة انك تدوري على الرومانسية في الأماكن الصح، كل زوجين بيفسروا الرومانسية بشكل مختلف، لبعض الناس الرومانسية هي عشاء على ضوء الشموع ومحادثة عميقة، وناس تانية بتشوف الرومانسية مغامرة مجنونة في مكان معزول، ابذلوا جهد عشان تستمتعوا باللي حببكوا في بعض في الأول خالص.
سادساً اوقات ممكن تحسي انك هتبطلي تحبي جوزك او انك بتبعدي عنه في اي مرحلة من مراحل الجواز مش لازم بعد الخلفة، عشان ترجعي الرومانسية اطلعوا من منطقة الراحة بتاعتكم وجربوا حاجة جديدة مع بعض، نشاط جديد مشترك في حياتكم ممكن يسبب رومانسية جديدة في انها تظهر في حياتكم، ماتخافوش من التجربة، سافروا كتير مع بعض، قدروا بعض وماتفتكروش انكم نفس الأشخاص اللي كنتوها قبل الخلفة او من خمس سنين، انتوا الاتنين اتغيرتوا كتير في الغالب، فإستمتعوا بأنكم تتعرفوا على بعض من اول وجديد، فاكرين اول مرة اتعرفتوا على بعض وحسيتوا بكل المشاعر دي؟ دلوقتي ممكن تجربوها تاني.
رشا سلامة مستشارة علاقات حاصلة على بكالوريوس في علم النفس وماجستير في علم النفس الإرشادي من الجامعة الأمريكية في القاهرة، رشا كان دايماً عندها شغف بالسفر وبتحب المغامرات، في 2017 أسست The RE اول خدمة سفر للأزواج في الشرق الأوسط بهدف مساعدة الناس اللي في علاقة انهم يحسنوا علاقتهم.
