دلوقتي في أي حتة نقعد فيها أو نروحها وكل ما نتجمع عيالنا بتبقى عينيهم في تليفوناتهم ومش حاسين بأي حاجة حواليهم، ماحدش مركز في أي حاجة بتحصل في الواقع، حتى الطفل اللي عنده 5 سنين بقى عنده موبايل ونت وسوشيال ميديا.
في أهل بيستغلوا إنشغال عيالهم في كل ده علشان يلاقوا وقت لنفسهم، وبالتالي في أطفال كتير بيبقوا قريبين من ناس غريبة أكتر من قربهم من أهلهم برغم إنهم عايشين في نفس البيت. في أمهات علشان تعرف تفاصيل يوم أولادها بيدخلوا على الفيسبوك أو انستاجرام ويشوفوا ال stories، وفي بياخدوا الباسوورد بتاعة فيسبوك علشان يراقبوهم، وكل ما يحسوا إنهم بقوا فاهمين فيplatform يطلعلهم واحد تاني مايعرفوش عنه حاجة، وفي وسط الزحمة دي كلها لازم تسألي نفسك إزاي أعرف أتواصل معاهم وهما طول الوقت ماسكين الموبايلات؟
الحل إنك تقعدي وتتكلمي معاهم عن خطورة العالم الإفتراضي كله، وتحكيلهم قصص وحاجات سمعتيها عن ناس اتعرضوا لأذى كبير جداً بسبب السوشيال ميديا، بسبب مشاركة تفاصيل حياتهم ومعلومات شخصية عنهم اللي استُخدمت ضدهم ووقعتهم في مشاكل كبيرة دمرت حياتهم.
حاولي ماتخليش الموبايل في إيديهم طول الوقت، إشغليهم بحاجات تانية تقلل من هوسهم بالسوشيال ميديا والشات وال status ، اتفرجوا على التلفزيون مع بعض أو اخرجوا أو حتى اعمليلهم أكلة حلوة بيحبوها على العشا مع فيلم بيحبوه.
وصدقيني مفيش أجمل من إن تبقى علاقتك قوية بعيالك، لما إبنك يحس قد إيه انتي بتحبيه وخايفة عليه وقد ايه عايزاه يعيش حياة سعيدة مايشوفش فيها حاجة وحشة ومايتعرضش لأذى؛ هايفهم إنك لما بتمنعي عنه حاجة مش بتمنعيها كدة وخلاص بتمنعيها علشان مايتأذيش ويعاني، هايصدقك وهايعمل اللي بتقولي عليه بصدر رحب. الكلام هو أبسط وأنجح طريقة تقربك من عيالك، هايخليكوا تتفاهموا ومش هايبقى في سوء تفاهم ولا مسافات، واختمي قعدات الصفا دي بحُضن، هاتلاقي إن مفعوله زي السحر بيحل كل المشاكل والخلافات اللي بينك وبينهم، طمنيهم إنك مش هاتسمحي لحد إنه يأذيهم أبداً، وإنك هاتبقي دايماً في صفهم مهما حصل لو اتكلموا معاكي وحكولك. ابدأي الكلام بسؤال بسيط: “يومك كان عامل ازاي؟”
وصدقيني مفيش أجمل من إن تبقى علاقتك قوية بعيالك، لما إبنك يحس قد إيه انتي بتحبيه وخايفة عليه وقد ايه عايزاه يعيش حياة سعيدة مايشوفش فيها حاجة وحشة ومايتعرضش لأذى؛ هايفهم إنك لما بتمنعي عنه حاجة مش بتمنعيها كدة وخلاص بتمنعيها علشان مايتأذيش ويعاني، هايصدقك وهايعمل اللي بتقولي عليه بصدر رحب.
مهمة الأمومة بتبقى صعبة كل فترة عن اللي قبلها، بس أولادك دايماً يستحقوا كل الجهد والمعافرة.
ترجمة: تسنيم عبدالله
