ميدو برسوم المشهور بـ ميدو eats، ميدو معروف بابتكاراته اللذيذة وكمان مدونته اللي بيتكلم فيها عن الأكل. اتكلمنا معاه وقرر يحكيلنا أسراره المتعلقة برمضان!
بيقولوا ماتفطروش برّا أبداً في رمضان، هل دي نصيحة في محلها؟ ولو لأ تنصح الناس يفكروا ازاي وهما بيختاروا مكان الفطار؟
أيوة دي نصيحة في محلها جداً، لإني بصراحة بلاقي إن كل البوفيهات بيبقى مستواها أقل من المطلوب في رمضان من ناحية جودة الأكل. وصعب جداً على المطاعم إنهم يعملوا حاجة أحسن من كدة. بس لو تعرفوا مطاعم كويسة بتتصل تحجز وتقولهم الأكل اللي هاتاكله من المنيو بتاعهم فده هايكون أحسن حل.
إيه الأماكن اللي بتحب تتسحر فيها؟
كل أماكن السحور شبه بعض. أحسن سحور هو سحور البيت. أغلب الناس بتحب تتسحر بباقي أكل الفطار، ومفيش ألذ من كدة!
عندك أكلة معينة بتحب تاكلها في رمضان بس؟ لو عندك إيه هي؟
أنا شخصياً بحب أبتكر في الحلويات في رمضان. بس مش الابتكارات اللي تموع النفس اللي هي حط أي حاجة مسكرة على أي حاجة مسكرة تانية وخلاص! لأ ابتكارات بتجمع بين التحلية الشرقي والغربي، يعني مرة عملت بسبوبسة بالبرتقال وعجبت الناس جداً!
إيه أسهل تحلية ممكن تتعمل في رمضان لما يكون مفيش وقت؟
أسهل حاجة طبق الخشاف. حط مكسرات مشكلة، وفاكهة مجففة على بعض، وعليهم تمر هندي أو لبن وسيبيها في الثلاجة كام ساعة، وهاتنبهر بالنتيجة اللذيذة!
إيه مكونات الأكل اللي لازم تبقى موجودة دائماً في الثلاجة خصوصاً في رمضان؟
زبادي، قمر الدين، تمر هندي مركز، بيض، رز مطبوخ، أو مكرونة ولانشون أو تركي مدخة وجبن.. بس خلي بالك من آخر حاجتين دول لإن الملح اللي فيهم ممكن يخليك عطشان طول ساعات الصيام.
